میرپورخاص:نیپال میں ایشیا کپ وہیل چئیر کرکٹ ٹورنامنٹ جیتنے کی خوشی میں ریلی نکالی گئی

میرپورخاص،باغی ٹی وی (نامہ نگار سید شاہزیب شاہ کی رپورٹ )نیپال کے دارالحکومت کھٹمنڈو میں دوسرا ایشیا کپ وہیل چئیر کرکٹ ٹورنامنٹ پاکستان وہیل چئیر کرکٹ ٹیم نے سری لنکا کو شکست دیکر جیت لیا، گلستان معذورین میرپور خاص کی جانب سے نیپال میں ہونے والے دوسرے ایشیا کپ کی فاتح قومی وہیل چیئر کرکٹ ٹیم کے اعزاز میں ایک ریلی نکالی گئی ،یہ ریلی گلستان معذورین میرپور خاص گاما اسٹیڈیم سے میرپورخاص پریس کلب پر اختتام پذیر ہوئی اور افراد باہم معذورین میں مٹھائی تقسیم کی گئی

اس موقع پر صدر میرپورخاص پریس کلب نظیر پنھور،سینئر صحافی شوکت پنھور،امجد کاظمی گلستان معذورین کے سرپرست اعلی آفاق احمد خان، صدر قمر الدین ملک ، نائب صدر حفیظ سرھیو،جنرل سیکرٹری علی نواز سرھیو،خازن صلاح الدین،فیصل بروہی اور افراد باہم معذورین کی بہت بڑی تعداد موجود تھی جو کہ اس خوشی کے موقع پر پریس کلب پر اپنی خوشی کا اظہار کر رہے تھے اور پاکستانی ٹیم اور کپتان ذیشان تقی کے حق میں نعرے بازی کر رہے تھےاور پاکستانی وہیل چیئر کرکٹ ٹیم کو مبارک باد پیش کررہے تھے

انہوں نے وزیراعظم پاکستان سے اپیل کی کہ جب فاتح پاکستانی وہیل چیئر کرکٹ ٹیم پاکستان پہنچے تو ایئرپورٹ پر پوری ٹیم کا سرکاری سطح کا والہانہ استقبال کیا جائے اور ایشیا کپ جیتنے پر پوری ٹیم کو انعامات و اعزازات سے نوازا جائے تاکہ آئندہ بھی یہ وہیل چیئر کرکٹرز اسی طرح محنت کر سکیں اور اپنے ملک کا نام روشن کر سکیں