اسلام آباد / کراچی (باغی ٹی وی)محکمہ موسمیات نے خبردار کیا ہے کہ ملک کے بالائی علاقوں میں 13 سے 16 جون کے دوران آندھی، گرج چمک، ژالہ باری اور موسلادھار بارش کا امکان ہے جبکہ جنوبی علاقوں میں شدید گرمی اور گرد آلود ہوائیں متوقع ہیں۔ محکمہ موسمیات نے بالائی سندھ کے تمام اضلاع میں آندھی اور بارش کی پیشگوئی کرتے ہوئے بتایا کہ جھکڑ چلنے اور بارش کے باعث جاری گرمی کی لہر میں کچھ کمی واقع ہو سکتی ہے۔
محکمہ موسمیات کے مطابق جمعہ کے روز خیبرپختونخوا، شمال مشرقی پنجاب، خطہ پوٹھوہار، اسلام آباد، کشمیر اور گلگت بلتستان میں مطلع جزوی ابر آلود رہنے کے علاوہ آندھی اور گرج چمک کے ساتھ بارش جبکہ چند مقامات پر ژالہ باری کا امکان ہے۔ ہفتہ کے روز بھی انہی علاقوں میں موسمی صورتحال برقرار رہنے کی پیشگوئی کی گئی ہے۔
محکمہ موسمیات نے متنبہ کیا ہے کہ 13 سے 16 جون کے دوران آندھی، تیز ہواؤں اور ژالہ باری کے باعث کمزور انفراسٹرکچر جیسے بجلی کے کھمبے، درخت، گاڑیاں اور سولر پینل کو نقصان پہنچنے کا خدشہ ہے۔ متعلقہ اداروں اور شہریوں کو احتیاط برتنے کی ہدایت جاری کر دی گئی ہے۔
ادھر پنجاب، خیبرپختونخوا، اسلام آباد، کشمیر اور گلگت بلتستان میں بھی آئندہ تین دنوں کے دوران بارشوں کا سلسلہ جاری رہنے کا امکان ہے۔ واضح رہے کہ ملک کے بیشتر میدانی علاقے شدید گرمی کی لپیٹ میں ہیں۔ گزشتہ روز جیکب آباد میں درجہ حرارت 50 ڈگری، دادو، نور پور تھل اور سبی میں 49 ڈگری جبکہ سرگودھا، بہاولنگر، بھکر، جوہرآباد، گوجرانوالہ اور حافظ آباد میں 48 ڈگری سینٹی گریڈ ریکارڈ کیا گیا۔
محکمہ موسمیات کے مطابق گزشتہ 24 گھنٹوں کے دوران ملک کے بیشتر علاقوں میں موسم گرم اور خشک رہا تاہم چترال اور کالام میں 2 ملی میٹر بارش ریکارڈ کی گئی۔
عوام کو ہدایت کی گئی ہے کہ وہ غیر ضروری طور پر دھوپ میں نکلنے سے گریز کریں، پانی اور مشروبات کا استعمال زیادہ کریں اور آندھی یا تیز ہواؤں کی صورت میں کھلے مقامات سے دور رہیں۔
