اوچ شریف (باغی ٹی وی نامہ نگار حبیب خان)چاہا بستی چوک میں حیرت انگیز اور غیر معمولی واقعہ پیش آیا جہاں ایک حاملہ خاتون نے جامعہ مسجد کے واش روم میں اچانک بچے کو جنم دے دیا۔ واقعہ کے وقت خاتون نیم بے ہوش تھی جس پر مسجد انتظامیہ اور اہل علاقہ نے فوری طور پر ریسکیو 1122 کو اطلاع دی۔
ریسکیو ٹیم موقع پر پہنچی تو خاتون کی حالت نازک تھی۔ ریسکیو اہلکاروں نے مکمل راز داری اور احتیاط کے ساتھ زچہ و بچہ کو فوری طبی امداد فراہم کی۔ ابتدائی طبی امداد کے بعد دونوں کو تشویشناک حالت میں ٹی ایچ کیو ہسپتال احمدپور شرقیہ منتقل کر دیا گیا، جہاں ان کا علاج جاری ہے۔
علاقہ مکینوں نے ریسکیو 1122 کی بروقت کارروائی اور انسانی ہمدردی پر مبنی خدمات کو بھرپور سراہتے ہوئے کہا کہ ریسکیو ٹیم نے ذمہ داری اور پیشہ ورانہ مہارت کا ثبوت دیا ہے۔







