ڈاکٹرغلام مصطفی بڈانی
سکھر، باغی ٹی وی( نامہ نگار مشتاق علی لغاری) سکھر کے علاقے نیوپنڈ، حد مائکرو کالونی میں ایک دل دہلا دینے والا واقعہ پیش آیا جہاں جتوی برادری کی خواتین نے اپنی لاپتہ بیٹی کی بازیابی کے لیے رات کے سناٹے میں سڑکوں پر احتجاج کیا۔ ہاتھوں میں قرآن پاک تھامے، اپنی ننھی بچیوں اور چھوٹے بچوں کے ہمراہ یہ خواتین رات کے چار بجے جب پورا شہر نیند کی آغوش میں تھا، اپنی فریادیں لے کر نکل آئیں۔ ان کی آنکھوں میں آنسو تھے، زبان پر دعائیں تھیں اور دل میں ایک ہی پکار تھی: "ہماری بیٹی واپس دلاؤ!”
مظاہرین خواتین کا کہنا ہے کہ ان کی بیٹی اپنے شوہر کے گھر سے لاپتہ ہو گئی ہے اور اب اس کے سسرال والے ان پر الٹا دباؤ ڈال رہے ہیں کہ "بہو واپس کرو”، جبکہ وہ خود اس صورتحال سے لاعلم اور سخت پریشان ہیں۔
ایک بوڑھی ماں نے قرآن کو سینے سے لگاتے ہوئے دردناک انداز میں چیخ کر کہا، "ہمیں کیوں سزا دی جا رہی ہے؟ ہماری بیٹی غائب ہے اور ہم پر ظلم ہو رہا ہے! یا اللہ انصاف کر!”
احتجاج کے دوران مظلوم عورتوں نے پولیس حکام سے پرزور اپیل کی:
"ہم ایس ایس پی سکھر، ڈی آئی جی سکھر، اور آئی جی سندھ سے اپیل کرتے ہیں کہ ہمیں انصاف دلایا جائے۔”
"ہماری بیٹی کو ان ظالموں سے بازیاب کروایا جائے۔”
"ہماری فریاد سنی جائے، ہمیں تحفظ دیا جائے۔”
خواتین نے خبردار کیا کہ اگر انہیں انصاف نہ ملا تو وہ قرآن پاک سر پر رکھ کر مزید سخت احتجاج پر مجبور ہوں گی۔ یہ احتجاج حکام کی توجہ مبذول کرانے اور اپنی لاپتہ بیٹی کی فوری بازیابی کا مطالبہ کرنے کے لیے ایک علامتی لیکن شدید اقدام تھا۔
