یکجہتی کشمیر کی مناسبت ایل ٹی سی کی جانب سے تقریب ہوئی

لاہور ٹرانسپورٹ کمپنی نے کشمیریوں کے ساتھ اظہار یکجہتی کے لئے لبرٹی گول چکر پر ایک منٹ کی خاموشی اختیار کی ہے، کشمیریوں کے لئے دعا بھی کروائی گئی ہے، سی ای او ایل ٹی سی خواجہ سکندر زیشان بورڈ آف ڈائریکٹرعون صادق، ڈی جی ایم انفورسمنٹ فیصل یوسف، ٹرانسپورٹ انفورسمنٹ انسپکٹرز ودیگر نے شرکت کی ہے.

خواجہ محمد سکندر ذیشان کا کہنا تھا کہ مودی نے 5 اگست 2019ء کو اقوام متحدہ کے ضابطوں کی دھجیاں اڑا ئیں اوربھارت نے غیر قانونی طورپر مقبوضہ جموں و کشمیر کی حیثیت تبدیل کر کے انسانی حقوق کو پامال کیا ہے، مودی سرکار نے مقبوضہ جموں و کشمیر میں بربریت کا بازار گرم کررکھا ہے، بھارت میں اقلیتوں پر عرصہ حیات تنگ کردیا گیا ہے، 22 کروڑ پاکستانی اور لاہور ٹرانسپورٹ کمپنی کے تمام ملازمین کشمیریوں کے ساتھ کھڑے ہیں اور کھڑے رہیں گے، بھارت کے زیر تسلط غیر قانونی مقبوضہ جموں و کشمیر کے لاک ڈاؤن کو 2 سال مکمل ہوگئے ہیں، مگر کشمیریوں کے دکھ کم نہ ہوئے، کشمیریوں پر انسانیت سوز مظالم پر بے حسی عالمی برادری کے خلاف چارج شیٹ ہے.

بورڈ آف ڈائریکٹرعون صادق کا کہنا تھا کہ مشکل ترین حالات میں بھی کشمیریوں کا عزم اور حوصلہ برقرار ہے، کشمیر کا بحران عالمی برادری کی بے حسی کا نوحہ ہے، غیر قانونی بھارتی مقبوضہ جموں و کشمیر کے عوام کی لازوال جدوجہد کو سلام پیش کرتے ہیں، کشمیری عوام ہمارے دلوں میں بستے ہیں، کشمیر پاکستان کی شہ رگ ہے اورپاکستان کشمیر کے بغیر نامکمل ہے، ہم کشمیر کاز سے ایک انچ بھی پیچھے نہیں ہٹ سکتے ہیں، کشمیری عوام کی سفارتی، سیاسی اوراخلاقی حمایت جاری رکھیں گے.

ڈی جی ایم انفورسمنٹ فیصل یوسف کا کہنا تھا کہ ان شاء اللہ کامیابی کشمیری عوام کا مقدر بنے گی، بھارت کو ہر ظلم کا حساب دینا ہوگا، بے گناہ شہید کشمیریوں کا خون رنگ لائے گا.