ننکانہ،کشمیریوں پر بھارتی افواج کے بہیمانہ مظالم کے خلاف یوم سیاہ منایا گیا

 ننکانہ صاحب:(نمائندہ باغی ٹی وی عبدالرحمان یوسف)
 باغی ٹی وی کی رپورٹ کے مطابق ملک بھر کی طرح ننکانہ صاحب میں بھی مقبوضہ کشمیر پر بھارت کے قبضے اور نہتے کشمیریوں پر بھارتی افواج کے بہیمانہ مظالم کے خلاف یوم سیاہ منایا گیا،محکمہ تعلیم کے زیر اہتمام ضلع بھر کے تمام تعلیمی اداروں جبکہ مختلف تنظیموں کی طرف سے احتجاجی ریلیاں نکالی گئیں، ننکانہ صاحب میں نکالی گئی مرکزی ریلی کی قیادت ڈپٹی کمشنر راجا منصور احمد نے کی جبکہ ریلی میں ایڈیشنل ڈپٹی کمشنر ریوینو ڈاکٹر عثمان خالد، سی ای او ایجوکیشن اتھارٹی احسن فرید، سی ای او ہیلتھ اتھارٹی ڈاکٹر کامران واجد اور اسسٹنٹ کمشنر صولت حیات وٹو سمیت ضلعی افسران، سیاسی و سماجی رہنماؤں، علماء کرام اور شہریوں کی کثیر تعداد نے شرکت کی،ریلی ڈپٹی کمشنر آفس سے شروع ہو ئی جو مختلف راستوں سے ہوتی ہوئی تحصیل موڑ پہنچ کر اختتام پذیر ہو ئی،سیاہ پرچم ہاتھوں میں تھامے ریلی کے شرکاء نے بازوؤں پر سیاہ پٹیاں باندھ رکھی تھیں جبکہ ہاتھوں میں بینرز اور پلے کارڈز اٹھا رکھے تھے جن پر کشمیریوں کی آزادی کے حق اور بھارت کے خلاف نعرے درج تھے،ریلی کے شرکاء نے کشمیر بنے گا پاکستان،کشمیریوں سے رشتہ کیا لا الہ الا اللہ اور بھارت مردہ آباد کے نعرے بھی لگائے،شرکاء نے اس عزم کا اظہار کیا کہ وہ جدوجہد آزادی میں کامیابی کے حصول تک اپنے کشمیریوں بھائیوں کے ساتھ ہے انشاء اللہ مقبوضہ کشمیر میں ظلم کی سیاہ ختم ہو نے والی ہے اور کشمیر میں آزادی کا سورج طلوع ہو گا انہوں نے اقوام متحدہ اور انسانی حقوق کی عالمی تنظیموں سے مطالبہ کیا کہ وہ نہتے کشمیریوں پر بھارتی افواج کے مظالم کا نوٹس لے اور انہیں اپنی پاس کردہ قرار دادوں کے مطابق حق خود ارادیت دے۔