رخ کماں تھا ادھر تیر کا نشاں ادھر
ہمارا دوست تو تھا اور مگر ہمارا نہ تھا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
پورا نام: ابونصر غزالی
ولدیت: مولانا عبدالجبار
آبائی وطن: میرغیاث چک،
ضلع نالندہ، بہار
جائے ولادت: میر غیاث چک
ضلع نالندہ، بہار
تاریخ ولادت: 04 اکتوبر 1938ء
تاریخ وفات: 08 دسمبر 2011ء
تعلیم: ایم اے
پیشہ: درس و تدریس
استاد، ریڈر شعبۂ اردو
مولانا آزاد کالج، کلکتہ
آغازِ شاعری: 1958ء
تلمیذ: کسی سے اصلاح نہیں لی
تصنیفات:
۔۔۔۔۔۔
۔ (1)لہو کا درد-1982ء
۔ (نظموں اور غزلوں کا مجموعہ)
۔ (2)بنگالی شعراء-1982ء
۔ (تعارف و ترجمہ)
۔ (3)کوہِ فاراں سے آتی صدا
۔ (نظموں کا مجموعہ)
۔ (4)دور اک پیڑ
۔ (غزلوں کا مجموعہ)
۔ (5)میزانِ قدر
۔ ـ(تنقیدی مضامین کا مجموعہ)
پتا: 37، امداد علی لین، فاراں ہاؤس
کلکتہ-700016
غزل
۔۔۔۔۔۔
رخ بہار پہ عکس خزاں بھی کتنی دیر
مخالفت پہ تلا آسماں بھی کتنی دیر
کسی کا نام کسی کا نشاں بھی کتنی دیر
ہو جسم خاک تو پھر استخواں بھی کتنی دیر
شکست و ریخت کی اس منزل پریشاں میں
یقیں کی عمر بھی کتنی گماں بھی کتنی دیر
بندھا ہے عہد جو تیغ و گلو کے بیچ تو پھر
لرزتی کانپتی ننھی سی جاں بھی کتنی دیر
نکل چلو ہے ابھی سہل راستہ یارو
کہ مہرباں ہے تو یہ مہرباں بھی کتنی دیر
برائے شب بھی کشادہ ہے میرا دروازہ
کہ صبح آئی تو یہ میہماں بھی کتنی دیر
سخن وری نہ سہی معجزہ سہی لیکن
یہ طرز فکر یہ حسن بیاں بھی کتنی دیر
غزل
۔۔۔۔۔۔
برف زار جاں کی تہہ میں کھولتے پانی کا ہے
جو بھی قصہ ہے لہو کی شعلہ سامانی کا ہے
آسماں سے روشنی اتری بھی دھندلا بھی چکی
نام روشن ہے تو بس ظلمت کی تابانی کا ہے
ریگزار لب کہ ہر سو اگ رہی ہے تشنگی
آنکھ میں منظر اچھلتے کودتے پانی کا ہے
بے سبب ہرگز نہیں دست کرم کم کم ادھر
اس کو اندازہ ہماری تنگ دامانی کا ہے
شہر ہو یا ہو بیاباں گھر ہو یا کوئی کھنڈر
سلسلہ چاروں طرف غول بیابانی کا ہے
موڑ پر پہنچے تو دیکھو گے کہ ہر منزل ہے سہل
بس یہی اک راستہ ہے جو پریشانی کا ہے
غزل
۔۔۔۔۔۔
وہ خوف جاں تھا کہ لب کھولنا گوارا نہ تھا
صدائیں سہمی کچھ ایسی سخن کا یارا نہ تھا
تمام اپنے پرائے کٹے کٹے سے رہے
چھری جو چمکی تو اس نے کسے پکارا نہ تھا
رخ کماں تھا ادھر تیر کا نشانہ ادھر
ہمارا دوست تو تھا اور مگر ہمارا نہ تھا
رفو طلب نظر آتا ہے دیکھیے جس کو
لباس جاں تو کبھی اتنا پارہ پارہ نہ تھا
خدا کرے کہ رہے مہرباں سدا تم پر
عزیزو وقت کہ اک لمحہ بھی ہمارا نہ تھا
اڑانیں بھرتے پرندوں کے پر کتر ڈالیں
نظر کے سامنے ایسا کبھی نظارہ نہ تھا
ہے دور حد نظر سے تو کیا قیامت ہے
ہمارے پاس تھا جب تک وہ اتنا پیارا نہ تھا
اشعار
۔۔۔۔۔۔
آنکھ بھر آنسو تو دامن بھر لہو
زندگی ہے بیسوا کا پیار کیا
غزل کے شعروں میں رکھتا ہے وہ چھری کی دھار
کہ تیکھے لہجے میں سچائیاں سناتا ہے
تمام اپنے پرائے کٹے کٹے سے رہے
چھری جو چمکی تو اس نے کسے پکارا نہ تھا
پھول ، خوشبو ، ہوا ، روشنی ، جلترنگ اور تو
خاک ، پتھر ، سیاہی ، سمندر ، بھنور اور میں
باہر باہر دیکھ چکا تو اب کچھ اپنے اندر دیکھ
نظارے کا لطف یہی ہے الگ الگ ہر منظر دیکھ
