چھپے ہوئے ہیں ہزار جذبہ
بلا کی ہیں یہ کمال آنکھیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نام :شمیم فاطمہ اسریٰ
قلمی نام:اسریٰ رضوی
تاریخ ولادت:05 دسمبر 1993ء
آبائی وطن:علی نگر، بھیک پور، سیوان، بہار
تعلیم:ایم اے (اردو)، لکھنؤ یونیورسٹی
تصنیفات:اجتبیٰ حسین رضوی:شخصیت اور جہات
رہائش:بڑا باغ، مفتی گنج، لکھنؤ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
معروف شاعرہ شمیم فاطمہ اسریٰ کی 5 دسمبر 1993 میں سیوان ضلع کے گاؤں علی نگر بھیک پور میں ولادت ہوئی۔ ابتدائی تعلیم گھر میں اور پاس کے سرکاری مڈل اسکول میں ہوئی اور پھر قریبی ایس ٹی ڈی کالج سے انٹر کے بعد 2010 میں لکھنوں میں سکونت اختیار کی اور لکھنؤ یونیورسٹی سے بی اے اور ایم کیا۔ شاعری کا شوق بچپن سے تھا مگر ایم کے دوسرے سمسٹر میں شدت اختیار کر گیا اور نانی کے انتقال پر پہلی غزل 2013 کے اواخر میں لکھی۔
غزل
۔۔۔۔۔
اداس آنکھیں غزال آنکھیں
جواب آنکھیں سوال آنکھیں
ہزار راتوں کا بوجھ اٹھئے
وہ بھیگی پلکیں وہ لال آنکھیں
وہ صبح کا وقت نیند کچی
خمار سے بے مثال آنکھیں
بس اک جھلک کو تڑپ رہی ہیں
رہین شوق وصال آنکھیں
جھکی جھکی سی مندی مندی سی
امین ناز جمال آنکھیں
وہ ہجر کے موسموں سے الجھی
تھکی تھکی سی نڈھال آنکھیں
نہ جانے کیوں کھوئی کھوئی سی ہیں
بجھی بجھی پر خیال آنکھیں
ہیں شوخیوں سے چھلکنے والی
محبتوں سے نہال آنکھیں
اگر نگاہوں سے مل گئیں تو
کریں گی جینا محال آنکھیں
چھپے ہوئے ہیں ہزار جذبہ
بلا کی ہیں یہ کمال آنکھیں
غزل
۔۔۔۔۔
یہ آگ محبت کی بجھائے نہ بجھے ہے
بجھ جائے جو اک بار جلائے نہ جلے ہے
ٹوٹا جو بھرم رشتوں میں احساس و وفا کا
سو طرح نبھاؤ تو نبھائے نہ نبھے ہے
خوابوں کا محل یوں ہی بنایا نہ کرو تم
تعمیر جو ہو جائے گرائے نہ گرے ہے
دہلیز پہ دل کی جو قدم رکھے ہے کوئی
ٹک جائے ہے ایسے کے ہلائے نہ ہلے ہے
ہے باغ محبت میں وفا کا جو حسیں گل
مرجھا جو گیا پھر تو کھلائے نہ کھلے ہے
دل چیز ہے ایسی کہ اجڑ جائے جو ایک بار
پھر لاکھ بساؤ تو بسائے نہ بسے ہے
کیوں نقش لیے چشم تصور میں پھرو ہو
ہو جائے یہ گہرا تو مٹائے نہ مٹے ہے
کوشش تو بہت کی ہے کہ دھل جائے ہر اک عکس
اک شکل ہے ایسی کہ بہائے نہ بہے ہے
دیکھ آئی ہیں شاید کہیں محبوب کو اپنے
آنکھوں کی چمک آج چھپائے نہ چھپے ہے
باتوں من جو کر جائے ہے اقرار محبت
پھر بات کوئی اس سے بنائے نہ بنے ہے
ہر گام قدم اپنا سنبھالے رکھو اسریٰؔ
دامن پہ لگا داغ چھڑائے نہ چھٹے ہے
غزل
۔۔۔۔۔
خود کو دنیا میں نہ الجھاؤ خدا را محسن
اس کے پیغام کا سمجھو تو اشارا محسن
بیٹھ جانا کہیں تھک ہار کے زیبا ہے کیا
تو زمانے کا زمانہ ہے تمہارا محسن
پچھلی شب اس کی محبت نے کہا دھیرے سے
تجھ سے دوری نہیں اک پل بھی گوارا محسن
با خدا الفت سرور کی کرامت ہے یہ
جون کہہ کر جو زمانے نے پکارا محسن
اس کی الفت میں تم ہستی کو مٹا کر دیکھو
ایک دن ہوگا خدا خود ہی تمہارا محسن
کشتیاں پار لگانا ہے بھنور سے تم کو
ڈوبتے لوگوں کو دینا ہے سہارا محسن
اونچی اٹھتی ہوئی لہروں میں صدا دو اس کو
ابھی مل جائے گا کشتی کو کنارا محسن
صبح اس شوخ کے چہرے سے اٹھاتی ہے نقاب
گیسوئے حسن کو راتوں نے سنوارا محسن
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تلاش و ترسیل : . آغا نیاز مگسی
