بانی پی ٹی آئی عمران خان نے 9 مئی کے 8 مقدمات میں درخواست ضمانتوں کی جلد سماعت کے لیے لاہور ہائیکورٹ سے رجوع کر لیا۔
بانی پی ٹی آئی عمران خان نے اپنے وکیل بیرسٹر سلمان صفدر کے ذریعے لاہور ہائیکورٹ میں متفرق درخواستیں دائر کیں۔ ان درخواستوں میں عمران خان نے جناح ہاؤس حملہ کیس اور دیگر مقدمات میں ضمانت کی درخواست کی ہے۔عمران خان نے اپنی درخواست میں مؤقف اختیار کیا کہ ان کے خلاف سیاسی انتقام کے طور پر سازش کی گئی اور انہیں ان مقدمات میں نامزد کیا گیا۔ ان کا کہنا ہے کہ یہ مقدمات جھوٹے الزامات پر مبنی ہیں اور انہیں سیاسی مقاصد کے لیے بدنام کیا جا رہا ہے۔درخواست میں مزید کہا گیا کہ 8 مقدمات میں ضمانت کے لیے ہائیکورٹ سے رجوع کیا گیا تھا، اور اس پر 16 جنوری کو سماعت بھی ہوئی تھی۔ تاہم، پولیس کو نوٹس جاری ہونے کے باوجود درخواستوں کی سماعت کے لیے کوئی تاریخ نہیں دی گئی۔
بانی پی ٹی آئی عمران خان کی جانب سے استدعا کی گئی ہے کہ ان کی درخواست ضمانتوں کو فوری طور پر سماعت کے لیے مقرر کیا جائے، کیونکہ یہ نہ صرف انصاف کا تقاضا ہے بلکہ یہ انصاف ہوتا ہوا نظر بھی آنا چاہیے۔ انہوں نے عدالت سے درخواست کی کہ 9 مئی کے 8 مقدمات میں ان کی ضمانت کی درخواستوں کو جلد سماعت کے لیے مقرر کیا جائے۔
