فلسطین میں نسل کشی کا ذمہ دار اسرائیل ہے،عطا اللہ تارڑ

نیویارک: وفاقی وزیر اطلاعات و نشریات عطا اللہ تارڑ نے کہاہے کہ وزیراعظم شہبازشریف اقوام متحدہ میں خطاب میں فلسطین اور کشمیر کے مسئلے پر بات کریں گے-

باغی ٹی وی: نیویارک میں جنرل اسمبلی کے باہر میڈیا سے گفتگو کرتے ہوئے عطا اللہ تارڑ کا کہناتھا کہ فلسطین میں نسل کشی کا ذمہ دار اسرائیل ہے،فلسطینی بھائیوں کیلئے ہر ممکن مدد فراہم کررہے ہیں،پاکستان مشرق وسطیٰ میں امن کا خواہاں ہے،ان کا کہناتھا کہ اقوام متحدہ اجلاس کے دوران موسمیاتی تبدیلی پر بھی بات چیت ہوگی،پاکستان نے دہشتگردی کیخلاف جنگ میں بہت نقصان اٹھایا ہے، پاکستان میں مہنگائی سنگل ڈیجٹ پر آگئی ہے،ہماری آئی ٹی ایکسپورٹس 3.1بلین ڈالر تک پہنچ چکی ہیں،ان کا کہناتھا کہ وزیراعظم نے ہر فورم پر فلسطین کا مسئلہ اٹھایا ہے،وزیراعظم کے دورے کے پاکستان پر بہت اچھے نتائج مرتب ہوں گے۔

واضح رہے کہ وزیراعظم شہبازشریف لندن میں 2 روز قیام کے بعد نیویارک پہنچ گئے ہیں،وزیراعظم اقوام متحدہ کی جنرل اسمبلی کے اجلاس میں شرکت کریں گے، وزیراعظم کا 27 ستمبر کو عالمی فورم سے خطاب شیڈول ہے،شہبازشریف کی اقوام متحدہ کے سیکرٹری جنرل اور دیگر عالمی رہنماؤں سے ملاقاتیں بھی شیڈول ہیں، وزیراعظم کی آئی ایم ایف حکام کے ساتھ ملاقاتیں بھی متوقع ہیں۔