فیصل آباد (اے پی پی) بابائے قوم، بانی پاکستان قائد اعظم محمد علی جناح ؒ کی ہمشیرہ، مادر ملت محترمہ فاطمہ جناح جو 31جولائی 1893 ء کو کراچی میں پیدا ہوئی تھیں کی 126ویں سالگرہ کل31 جولائی بروزبدھ کو ملک بھر میں قومی جوش و جذبے اور انتہائی عقیدت و احترام سمیت بھر پور طریقے سے منائی جائے گی۔ اس موقع پر پاکستان مسلم لیگ، نظریہ پاکستان فاؤنڈیشن، تحریک پاکستان ورکرز ٹرسٹ اور دیگر تنظیموں کے زیر اہتمام سیمینارز، کانفرنسز، مذاکروں، مباحثوں اور دیگر تقریبات کا اہتمام کیا جائے گا جس میں مادر ملت کی تحریک پاکستان میں اپنے بھائی کے شانہ بشانہ جدو جہد سمیت ملک و قوم کیلئے ان کی گراں قدر خدمات کو شاندار الفاظ میں خراج عقیدت پیش کیا جائے گا۔ مادر ملت جنہیں شمع جمہوریت کے نام سے بھی یاد کیا جاتا ہے نے برصغیر کی مسلم خواتین کو مسلم لیگ کے پلیٹ فارم پر جمع کرنے میں اہم کردار ادا کرنے سمیت انہیں مردوں کے شانہ بشانہ تکمیل پاکستان کی جدو جہد میں عملی طور پر شریک کیا۔ محترمہ فاطمہ جناح نے عمر رسیدہ ہونے کے باوجود قوم کے پر زور اصرار پر وطن عزیز کی صدارت کے عہدہ کیلئے صدر ایوب خان کے مقابلے میں الیکشن لڑا لیکن انہیں خفیہ ہاتھوں نے شکست سے دوچار کر دیا۔محترمہ فاطمہ جناح نے 74برس کی عمر میں 9جولائی 1967ء میں وفات پائی۔ مادر ملت کے یوم ولادت اور سالگرہ کے موقع پر قرآن خوانی کی محافل کا بھی اہتمام کیا جائے گا جس میں شہدائے تحریک پاکستان سمیت وطن عزیز کی سلامتی، استحکام، خوشحالی، فلاح کیلئے خصوصی دعائیں مانگی جائیں گی۔
Shares:
