بورےوالا (نمائندہ باغی ٹی وی) یعقوب آباد گلی نمبر 3 کے رہائشی ایک اور بچے کو آوارہ کتے نے کاٹ لیا۔ بورےوالا شہر اور گردونواح میں آوارہ کتوں کی بھرمار کی وجہ سے شہریوں کا جینا محال ہو چکا ہے۔
تفصیلات کے مطابق یعقوب آباد گلی نمبر 3 کے رہائشی رضوان اعظم کے 4 سالہ بیٹے معین علی کو گلی کے سامنے آوارہ کتے نے کاٹ لیا اور زخمی کر دیا۔ جس کو تحصیل ہیڈ کوارٹر ہسپتال بورےوالا منتقل کیا گیا جہاں پر ڈاکٹرز نے بچے کو طبی امداد فراہم کی۔ جبکہ ذرائع کے مطابق بورےوالا تحصیل ہسپتال میں کتے کے کاٹنے کی ویکسین بھی نایاب ہے۔ گزشتہ ایک ہفتے میں یعقوب آباد ، 435 ای بی اور رحمت آباد کے علاقہ میں پاگل کتوں کے کاٹنے کی وجہ سے پانچ افراد زخمی ہو چکے ہیں۔
چند ہفتوں سے کتے کے کاٹنے کے واقعات میں تیزی دیکھنے میں آئی ہے۔ آوارہ کتوں نے شہریوں کا جینا محال کر کے رکھا ہوا ہے۔ کتوں کے کاٹنے کے واقعات میں تیزی آنے کا سبب محکمہ صحت اور بلدیہ کی جانب سے باقاعدہ اور وقتاً فوقتاً کتا مار مہم کا آغاز نہ کرنا ہے
اگر انتظامیہ کی سستی برقرار رہی تو ان واقعات کے وقوع پذیر ہونے میں مزید اضافہ ہو جائے گا۔ جس میں خدانخواستہ کسی کی جان چلی گئی تو اسکی تمام تر ذمہ داری ان اداروں پر عائد ہو گی جو شہر اور گردونواح میں کتوں کی تلفی کے ذمہ دار ہیں۔ ان واقعات پر عوامی و سماجی اور شہری حلقوں و دیگر نے وزیر اعلی پنجاب سمیت متعلقہ اعلی حکام سے مطالبہ کیا ہے کہ شہر بھر سے آوارہ کتوں کی تلفی کا عمل جلد از جلد شروع کرتے ہوئے ہمارے بچوں کی زندگیوں کو محفوظ بنایا جائے۔۔
