مولاناکی خواہشیں انکے سینے میں ہی دم توڑ جائینگی‘ایسا کس نے کہہ دیا

لاہور۔(اے پی پی)چیئر پرسن قائمہ کمیٹی برائے داخلہ مسرت جمشیدچیمہ نے مولانافضل الرحمان کی جانب سے وزیر اعظم کے استعفے تک مذاکرات سے انکارکو مضحکہ خیز قرار دیتے ہوئے کہا ہے کہ ان کی ساری خواہشیں ان کے سینے میں ہی دم توڑ جائیں گی، جے یو آئی(ف) عام انتخابات میں ملک بھر میں تقریباً50نشستوں پر انتخاب لڑتی ہے اس سے تو ان کا وزیر اعظم نہیں بن سکتا۔اپنے ایک بیان میں انہوں نے کہا کہ مولانافضل الرحمان آج تک اپنے آزادی مارچ کا جواز نہیں بتاسکے،مولانافضل الرحمان جس طرح خشک خوراک سمیت دیگرتیاریاں کر رہے ہیں اس پر عوام تشویش میں مبتلاہیں،حکومت نے جے یو آئی (ف) کے مطالبات سے آگاہی کیلئے کمیٹی تشکیل دیدی ہے لیکن مولانا فضل الرحمان کی ”میں نہ مانوں“کی رٹ اوروزیر اعظم کے استعفے کی بات انتہائی مضحکہ خیز ہے،انہوں نے کہا کہ ملک میں جب بھی کوئی وزیر اعظم بنتاہے تو مولانا فضل الرحمان کے دل میں بھی خواہش مچلتی ہے لیکن ہر بار کی طرح اس بار بھی انکی ساری خواہشیں ان کے سینے میں ہی دم توڑ جائیں گی، مولانافضل الرحمان نے سار ی زندگی دوسروں کو عارضی سہارے کے عوض اپنا حصہ وصول کیا ہے لیکن اس بار وہ بڑا ہاتھ مارنے کیلئے کوشاں ہیں،مسرت جمشیدچیمہ نے کہاکہ مولانافضل الرحمان کے نام نہاد آزادی مارچ کی سر گرمیوں پر ہمارے دشمن ملک میں بغلیں بجائی جارہی ہیں اس لئے ذاتی مفادات کو کچھ وقت کیلئے پس پشت ڈال دیا جائے۔