وزیر ایکسائز سندھ کا ایکسائز دفتر میں پیپلز پارٹی کے جھنڈے ملنے کا نوٹس

کراچی۔ (اے پی پی) صوبائی وزیر برائے ایکسائز اینڈ ٹیکسیشن و انسداد منشیات اور پارلیمانی امور مکیش کمار چاولہ نے محکمہ ایکسائز لاڑکانہ کے دفتر میں ضمنی انتخابات کے لئے لائے گئے پاکستان پیپلز پارٹی کے جھنڈوں کی موجودگی کا نوٹس لے لیا۔ ہفتہ کو جاری کردہ اعلامیہ کے مطابق انہوں نے متعلقہ ڈائریکٹر ایکسائز کو انکوائری کا حکم دیتے ہوئے فوری رپورٹ پیش کرنے کی ہدایت کی ہے۔ انہوں نے اس واقعے میں ملوث اہلکاروں کی معطلی کا حکم بھی جاری کیا ہے۔ مکیش کمار چاولہ نے اپنے ایک بیان میں اس عمل کو محکمہ ایکسائز کو بدنام کرنے اور ضمنی انتخابات کو متنازع بنانے کی سازش قرار دیا۔