پاور لومز مالکان سیلز ٹیکس کی ادائیگی کے بغیر مال فروخت نہ کرنے کا اعلان کر دیا

فیصل آباد (اے پی پی) پاور لومز مالکان نے یکم اگست بروز جمعرات سے رجسٹرڈ خریداروں کو 17فیصد اور نان رجسٹرڈ خریداروں کو 20 فیصد سیلز ٹیکس کی ادائیگی کے بغیر مال فروخت نہ کرنے کا اعلان کر دیا ہے جبکہ اس سلسلہ میں شناختی کارڈ کی شرط بھی لازمی قرار دیدی گئی ہے۔ چیئر مین آل پاکستان پاورلومز ایسوسی ایشن خالد محمود چیمہ نے ایک ملاقات کے دوران بتایاکہ یکم جولائی2019ء سے رجسٹرڈ انوائس پر 17فیصد اور نان رجسٹرڈ انوائس پر 20فیصد سیلز ٹیکس کا نفاذ ہو گیا ہے تاہم آل پاکستان کاٹن پاور لومزایسوسی ایشن نے فیصل آباد چیمبر آف کامرس اینڈ انڈسٹری اور دوسری ایسوسی ایشنوں کے ساتھ مل کر فی الحال سیلز ٹیکس کا نفاذ یکم اگست2019 ء تک ملتوی کروا دیا ہے لیکن اس ضمن میں مشترکہ طور پر فیصلہ کیا گیا ہے کہ پاور لومز مالکان یکم اگست 2019ء کے بعد کوئی بھی مال رجسٹرڈ خریدار کو 17فیصد اور نان رجسٹرڈ کو 20فیصد سیلز ٹیکس کی ادائیگی کے بغیر فروخت نہیں کریں گے نیز اس سلسلہ میں شناختی کارڈ کی شرط بھی لازمی ہو گی۔