چائلڈ پروٹیکشن بیورو نے ننھی زینب کے والد امین انصاری کو قصور میں فوکل پرسن مقرر کر دیا

لاہور۔(اے پی پی)چیئر پرسن چائلڈ پروٹیکشن بیورو سارہ احمد نے قصور میں معصوم بچوں کے ساتھ زیادتی کے بڑھتے ہوئے واقعات کے تناظر میں ننھی زینب کے والد امین انصاری کو قصور میں چائلڈ پروٹیکشن بیورو کا فوکل پرسن مقرر کر دیا ہے۔چیئر پرسن سارہ احمد نے اس بات کا اعلان گزشتہ روز قصور میں چائلڈ پروٹیکشن بیورو کے دورہ کے بعد زینب کے گھر ان کے والد امین انصاری سے ملاقات کے بعد کیا۔اس موقع پر چیئر پرسن سارہ احمد کا کہنا تھا کہ قصور میں معصوم بچوں کے ساتھ زیادتی کے واقعات انتہائی افسوسناک ہیں۔زینب کے واقعہ کے بعد امید تھی کہ ان واقعات میں کمی آئے گی لیکن بدقسمتی سے ایسے واقعات دوبارہ رونماہوئے۔ انھوں نے کہا کہ زینب کے والد امین انصاری زیادتی کا شکار بچوں کو انصاف کی فراہمی کے لئے کے چائلڈ پروٹیکشن بیورو کی ٹیم کے ساتھ مل کر کام کریں گے۔ اس موقع پر زینب کے والد امین انصاری نے چئیر پرسن چائلڈ پروٹیکشن بیورو سارہ احمد کا شکریہ ادا کیا اور کہا کہ وہ زیادتی کا شکار معصوم بچوں کو تحفظ اور انصاف کی فراہمی میں اپنا بھرپور کردار ادا کریں گے۔