کھیلوں کے میدان میں پاکستان کا نام روشن کرنے والے کھلاڑیوں پر پوری قوم کو فخر ہے۔ ڈی سی جاوید محمود

فیصل آباد(محمد اویس)ڈویژنل کمشنر محمود جاوید بھٹی نے کہا ہے کہ کھیلوں کے میدان میں پاکستان کا نام روشن کرنے والے کھلاڑیوں پر پوری قوم کو فخر ہے جن کی بھرپور حوصلہ افزائی کی جائے گی تاکہ زیادہ سے زیادہ نوجوان کھیلوں کی جانب راغب ہوں۔انہوں نے یہ بات سنوکر کے کھیل میں دوسری بار عالمی چیمپئن کا اعزاز حاصل کرکے فیصل آباد پہنچنے والے کھلاڑی محمد آصف کا اپنے دفتر میں استقبال کرتے ہوئے کہی۔اسسٹنٹ کمشنر مصور خاں نیازی ودیگر افسران بھی اس موقع پر موجود تھے۔ڈویژنل کمشنر نے عالمی چیمپئن سنوکر کے باصلاحیت کھلاڑی محمد آصف کا پرتپاک خیر مقدم کرتے ہوئے انہیں مبارکباد دی۔اس موقع پر محمد آصف کو ایک لاکھ روپے کا نقد انعام اور دیگر تحائف دئیے گئے۔ڈویژنل کمشنر نے کہا کہ بیماری کی حالت میں کھیلتے ہوئے عالمی اعزاز جیت کر محمد آصف نے نہ صرف اپنے خاندان بلکہ فیصل آباد اور طن عزیز کا مقام بلند کردیا ہے جس کی بدولت عالمی سطح پرپاکستان کا ابھرتا تشخص اجاگر ہوا ہے۔انہوں نے کہا کہ مختلف کھیلوں میں فیصل آباد کے کھلاڑیوں نے اپنی صلاحیتوں کو منوایا ہے جن کی ہمیشہ بھرپور سرپرستی کی جارہی ہے۔انہوں نے کہا کہ ڈویژنل انتظامیہ کھیلوں کی ترویج وترقی اور نوجوانوں کو کھیلوں کے میدانوں میں لانے کے لئے متعددسہولیات کے منصوبے پر بھی غوروخوض کیا جائے گا۔انہوں نے محمد آصف کی مزید ترقی اور صحت کی دعا کی۔سنوکر کے عالمی چیمپئن محمد آصف نے ڈویژنل کمشنر محمود جاوید بھٹی کا شکریہ ادا کیا اور کہا کہ ناسازی صحت کے باوجود جوش وجذبے اور قومی عزم سے کھلتے ہوئے عالمی اعزاز حاصل کرنا پاکستانی قوم کی دعاؤں کا نتیجہ ہے۔انہوں نے کہا کہ عالمی چیمپئن بننے پر شہریوں نے جس عزت وتوقیر سے نوازا ہے اس سے دیگر کھلاڑیوں کو بھی تحریک حاصل ہوگی۔انہوں نے سنوکر کے کھیل کی سرپرستی کرنے اور مختلف کھیلوں میں زیادہ سے زیادہ سہولیات کی فراہمی پرزور دیا۔محمد آصف نے ترکی میں کھیلے جانے والے سنوکر کے عالمی مقابلوں کے فائنل میں فلپائن کے کھلاڑی کو شکست دی اوراس چیمپئن شپ میں دنیا کے 44ممالک نے حصہ لیا۔
۔۔۔///۔۔۔