عید کی چھٹیاں ختم ہوتے ہی سیاسی رہنماوں کے خلاف نیب ہو گا ان ایکشن، کچھ کی ہوں گی گرفتاریاں ،نواز شریف بھی ایک بار پھر ضمانت کی امید سے ہیں.
باغی ٹی وی کی رپورٹ کے مطابق عید کی چھٹیاں ختم ہوئیں تو نیب بھر پور ایکشن کے لئے تیار ہے. سابق صدر آصف علی زرداری کی ضمانت پر کیس کی سماعت دس جون کو ہونی ہے، گزشتہ سماعت پر نیب زرداری کی گرفتاری کے مکمل انتظام کر کے آیا تھا لیکن عدالت نے ضمانت دے دی، نیب کی جانب سے وہ گاڑی لائی گئی تھی جس میں شہباز شریف کو گرفتار کر کے جیل منتقل کیا گیا تھا ،اب دس جون کوآصف زرداری کی ضمانت کی درخواست پر سماعت ہونی ہے اور نیب ایک بار پھر بھر پوری تیاری کر کے آئے گا.اگر آصف زرداری کو ضمانت مل گئ تو نیب کو ایک بار پھر خالی ہاتھ واپس لوٹنا پڑے گا. دوسری جانب سابق وزیراعظم نواز شریف کی طبی بنیادوں پر ضمانت کی سماعت گیارہ جون کو ہو گی، نواز شریف کو سپریم کورٹ نے طبی بنیادوں پر رہا کیا تھا چھ ہفتوں بعد عدالت نے ضمانت میں توسیع نہیں کی جس کی وجہ سے نواز شریف دوبارہ جیل میں ہیں اب نواز شریف نے اسلام آباد ہائیکورٹ میں طبی بنیادوں پر ضمانت کی دوبارہ درخواست دائر کی ہوئی ہے جس پر سماعت گیارہ جون کو ہو گی. نیب نے پیپلز پارٹی کے چیئرمین بلاول زرداری سے اوپل 225 منصوبے میں دس جون تک جواب طلب کر رکھا ہے، سابق وزیراعظم شاہد خاقان عباسی کے خلاف ایل این جی کیس کی تحقیقات بھی آخری مراحل میں ہے۔ چیئرمین نیب نے سابق وزیراعلیٰ سندھ سید قائم علی شاہ اور موجودہ وزیراعلیٰ سندھ سیدمراد علی شاہ کے خلاف ٹھٹھہ اور دادو شوگر ملز کیس کی انکوائریز کو باقاعدہ تحقیقات میں منتقل کرنے کی منظوری دیدی ہے . وزیر دفاع پرویز خٹک کے خلاف مالم جبہ کیس میں بھی اہم گرفتاریوں کا فیصلہ ہوگا جبکہ ریفرنس احتساب عدالت میں دائر کردیا جائے گا. عید کی چھٹیوں کے بعد اگلا ایک ماہ انتہائی اہم ہے جس میں بڑی بڑی شخصیات کے جیل میں جانے کا امکان ہے.
