ملک میں فری گوگل ایپلیکیشن سروسز برقراررہیں گی، وزیرآئی ٹی و ٹیلی کام
وفاقی وزیر آئی ٹی و ٹیلی کام سید امین الحق نے گوگل اپیلی کیشن کی بندش سے متعلق وزیرخزانہ اسحاق ڈار کوخط ارسال کردیا۔ امین الحق نے خط میں کہا کہ کچھ روز قبل ٹیلی کام آپریٹرز کی جانب سے وزارت آئی ٹی کو لکھے گئے خط میں اسٹیٹ بینک کی گوگل کو ادائیگی روکنے سے متعلق خدشات کا اظہار کیا گیا تھا۔ انہوں نے کہا کہ معاملے کی سنگینی پر تمام اسٹیک ہولڈرز سے مشاورت کے بعد وزارت خزانہ کو مراسلہ لکھنے کا فیصلہ کیا گیا۔
ٹیلی کام انڈسٹری پہلے ہی مشکلات کا شکار ہے اس طرح کے فیصلے معاملات مزید خراب کرسکتے ہیں۔ وفاقی وزیر آئی ٹی کا مزید کہنا تھا کہ اسٹیٹ بینک کی جانب سے ادائیگی روکنے سے پاکستان میں پیڈ گوگل ایپلی کیشن سروسز معطل ہوجائیں گی تاہم فری گوگل اپیلی کیشنز سروسز برقرار رہیں گی۔ امین الحق نے کہا کہ بین الاقوامی اداروں کو ادائیگی روکنے سے پاکستان کی ساکھ متاثر اور پیڈ ایپلی کیشنز استعمال کرنے والے افراد کو مشکلات کا سامنا کرنا پڑ سکتا ہے۔
تاہم واضح رہے کہ اس سے پہلے خبر سامنے آئی تھی کہ ملک بھر میں یکم دسمبر سے گوگل پلے اسٹور ناقابلِ استعمال ہونے کا خدشہ ہے۔ اسٹیٹ بینک نے عالمی سروس فراہم کرنے والوں کو 3 کروڑ 40 لاکھ ڈالرز تاحال ادا نہیں کیے۔ تفصیلات کے مطابق عالمی سروسز کی فراہمی کیلئے اسٹیٹ بینک کی جانب سے ساڑھے 3کروڑ ڈالرز کے لگ بھگ رقم کی ادائیگی منسوخ کیے جانے کے بعد موبائل صارفین مشکلات کا شکار رہیں گے۔ یکم دسمبر 2022 سے ہلی گوگل پلے اسٹور کی سروسز ڈاؤن لوڈ نہیں ہوسکیں گی۔
مرکزی بینک نے ڈی سی بی (ڈائریکٹ کیرئیر بلنگ) کا طریقۂ کار تبدیل کردیا ہے جس کے ساتھ ہی موبائل کمپنیز کے ذیعے ایمازون، گوگل اور میٹا سمیت عالمی سروسز فراہم کنندگان کو سالانہ 3 کروڑ 40 لاکھ ڈالرز کی ادائیگی رک گئی جس کے باعث پاکستانی صارفین مشکل میں آگئے۔ صارفین کو یکم دسمبر سے صرف کریڈٹ یا ڈیبٹ کارڈ سے ادائیگی کرنے کیلئے گوگل اور دیگر عالمی ایپس ڈاؤن لوڈ کرنے کی مجبوری کا سامنا ہوگا جبکہ کریڈٹ کارڈ کی سہولت پہلے ہی مخصوص حد تک میسر ہے۔ موبائل صارفین زیادہ تر گوگل پلے اسٹور سے ایپس ڈاؤن لوڈ نہیں کرسکیں گے۔
مزید یہ بھی پڑھیں؛
کارکنان کو آج کے جلسہ کیلئے پی ٹی آئی رہنماء منتے ترلے کرنے لگے
ہمارے ڈراموں کی کہانیاں گھٹیا ہیں جس میں رونا دھونا دکھایا جاتا ہے عفت عمر
دا لیجنڈآف مولا جٹ کی کامیابی کا فائدہ دوسری پاکستانی فلموں کو بھی ہو گا
یکم دسمبر سے ہی پاکستان کے زیادہ تر موبائل فونز کے ذریعے ایپ پلے اسٹور سے ڈاؤن لوڈ کرنے کی سہولت میسر نہیں ہوگی۔ وزارتِ آئی ٹی، پی ٹی اے اور 4 سی ایم اوز (سیلولر موبائل فون آپریٹرز) نے استیٹ بینک کو جمعہ کے روز معاملے سے آگاہ کرنے کیلئے خط لکھ دیا۔ مذکورہ خط میں سیلولر موبائل آپریٹرز، پی ٹی اے اور وزارتِ انفارمیشن ٹیکنالوجی و ٹیلی کمیونیکیشن نے ڈی سی بی طریقہ کار کو منسوخ کرنے کے فیصلے کو واپس لینے کی استدعا کی۔ امید کی جارہی ہے کہ اسٹیٹ بینک موبائل صارفین کو میسر سہولیات جاری رکھنے کیلئے اپنا فیصلہ واپس لینے پر رضامند ہوجائے گا۔
