بین الاقوامی رحمت اللعالمین کانفرنس کی تیاریاں مکمل،وزیراعظم اور کون کون خطاب کریگا؟
اسلام آباد ۔ 09 نومبر (اے پی پی) وفاقی دارلحکومت اسلام آباد میں بین الاقوامی رحمت اللعالمین کانفرنس کے انعقاد کے لئے انتظامات کو حتمی شکل دے دی گئی ہے۔ مذہبی امور کے وزیر نور الحق قادری براہ راست انتظامات کی نگرانی کررہے ہیں۔ دنیا کے مختلف ممالک سے آنے والے وفود کے خیرمقدم کے لئے بھی تیاریاں مکمل کرلی گئی ہیں۔
ایک خصوصی دستاویزی پروگرام بھی تیار کیا گیا ہے جو اس موقع پر نشر کیا جائے گا۔ بین الاقوامی رحمت اللعالمین کانفرنس (کل) اتوار کو یہاں کنوینشن سینٹر میں منعقد ہو گی جس میں قومی و بین الاقوامی وفود شرکت کریں گے۔
کانفرنس سے معروف علمائے کرام اور نعت خوان آقا دو جہاں حضور نبی اکرم کی خدمت میں نذرانہ عقیدت پیش کریں گے۔ سینیٹر فیصل جاوید نے اپنے ایک بیان میں اس حوالے سے کہا ہے کہ وزیراعظم عمران خان کانفرنس کے انعقاد میں خصوصی دلچسپی لے رہے ہیں۔ انہوں نے کہا کہ وزیراعظم حضور کی حیات طیبہ کے مختلف پہلوئوں اور تعلیمات کے بارے میں لکھے جانے والے تحقیقی مقالوں کی خود حوصلہ افزائی کریںگے۔
انہوں نے کہا کہ وزیراعظم عمران خان کانفرنس کی افتتاحی تقریب کی صدارت کریں گے جبکہ صدر مملکت ڈاکٹر عارف علوی اختتامی اجلاس کی صدارت کریں گے۔
پاکستان سمیت دنیا بھر میں میلادالنبیۖ (کل) اتوار کو مذہبی جوش و جذبے سے منائی جائے گی، اس حوالے سے خصوصی تقریبات، کانفرنسز اور میلاد ریلیوں کا انعقاد کیا جائے گا، ملک بھر کے چھوٹے بڑے شہروں، قصبوں اور دیہات میں مساجد، سرکاری و غیر سرکاری عمارات، مکانات سمیت گلی محلوں کو برقی قمقموں اور جھنڈیوں اور دیگر آرائشی مصنوعات سے سجایا جا رہا ہے۔
پاکستان میں میلادالنبیۖ کے دن کا آغاز وفاقی دارالحکومت اسلام آباد میں 31 جبکہ صوبائی دارالحکومتوں میں اکیس اکیس توپوں کی سلامی سے ہوگا اور رات کو محافل نعت، کانفرنسوں کا اہتمام اور چراغاں کا خصوصی اہتمام کیا جائے گا۔ مساجد میں اسلام کی بالادستی، مذہبی تعلیم کے فروغ، اتحاد، یکجہتی، بین المذاہب ہم آہنگی کے فروغ اور امت مسلمہ کی ترقی اور فلاح و بہبود کے لئے خصوصی دعائیں کی جائیں گی۔ سرکاری، غیر سرکاری اور مذہبی تنظیموں، میلاد کمیٹیوں اور پاکستانیوں نے اس دن کی مناسبت سے میلاد جلوسوں، سیمینارز، کانفرنسز اور مذاکروں سمیت متعدد پروگراموں کا اہتمام کیا ہے۔
ملک بھر کے طول ع عرض میں میلاد النبیۖ کے جلوس نکالے جائیں گے۔ اس دن کے موقع پر پاکستان بھر میں لوگوں نے سڑکوں، گلیوں، بازاروں، سرکاری اور نجی عمارتوں کو خوبصورتی سے اور رنگارنگ روشنیوں سے سجایا ہے اور بینرز بھی آویزاں کیے گئے ہیں جن پر عید میلاد النبی کی مناسبت سے تحریریں درج ہیں۔
واضح رہے کہ وزیر اعظم عمران خان نے میلاد النبیۖ کو شایان شان طور پر منانے کیلئے وفاقی اور صوبائی دارالحکومتوں کو خصوصی ہدایت کی تھی جس کی روشنی میں اقدامات کئے گئے ہیں اور اسلام آباد میں وزارت مذہبی امور و بین المذاہب ہم آہنگی کے زیر انتظام انٹرنیشنل سیرت کانفرنس منعقد کی جا رہی ہے جس میں ملکی و غیر ملکی وفود کی کثیر تعداد شرکت کرے گی
