گجرات پولیس کا سرائے عالمگیر کے علاقہ میں خطرناک مجرمان اشتہاریوں کے خلاف بڑا آپریشن،،

گجرات (چوہدری فیضان ارشاد سے)دہشت گردی،قتل، اغواء، اقدام قتل،ڈکیتی اور پولیس مقابلے جیسے 29مقدمات میں مطلوب 4ہائی پروفائل مجرم اشتہاری گرفتار
مجرمان اشتہاری سرائے عالمگیر کے علاقہ بیلہ اور رکھ پبی سرکار میں دہشت اور خوف و ہراس کی علامت بنے ہوئے تھے
تفصیلات کے مطابق ڈی پی او گجرات توصیف حیدر کی زیر قیادت پولیس نے سرائے عالمگیر کے علاقہ رکھ پبی سرکار اور بیلہ میں اشتہاریوں کے خلاف کامیاب آپریشن کیا۔ جس میں ڈی ایس پی سرائے عالمگیر سرکل،ایس ایچ او تھانہ صدر سرائے عالمگیر اور دیگر پولیس افسران نے حصہ لیا۔ پولیس ٹیم نے دن رات محنت کرکے جدید ٹیکنالوجی اور پیشہ ورانہ مہارت سے دہشت گردی،قتل، اغواء اور اقدام قتل،ڈکیتی اور پولیس مقابلے جیسے 29مقدمات میں مطلوب 4ہائی پروفائل مجرم اشتہاری گرفتارکرلئے۔مجرمان اشتہاریوں کا تعلق بدنام زمانہ فیقا گروپ سے ہے، جن میں یاسر عرف پہاڑ ولد گلزار احمد سکنہ کھوہار،نبیل عرف نوشی ولد نعیم سکنہ کھوکھرہ، ثقلین عرف موٹو ولد ملازم حسین سکنہ ڈھوری، قمر عباس ولد اصغر سکنہ جنڈ شریف شامل ہیں۔ جن کے خلاف تھانہ صدر سرائے عالمگیر،ڈنگہ اور گلیانہ میں سنگین نوعیت کے 29مختلف مقدمات درج ہیں۔بدنام زمانہ فیقا گروپ کے مجرمان اشتہاریوں نے علاقہ کا امن و امان تباہ کررکھا تھا اور ان کی گرفتار ی پولیس کے لئے چیلنج بنی ہوئی تھی۔ ڈی پی او توصیف حیدرنے رکھ پبی سرکار اور بیلہ کے علاقہ میں خطرناک اشتہاریوں کے خلاف خصوصی آپریشن کا ٹاسک ڈی ایس پی سرائے عالمگیر مدثر اقبال اور ایس ایچ او تھانہ صدر سرائے عالمگیر امیر عباس اور سب انسپکٹر شبیر احمد کو دیا۔جنہوں نے محکمانہ صلاحیتوں کو بروئے کا ر لاتے ہوئے علاقہ میں دہشت اور خوف و ہراس کی علامت بنے ہوئے چاروں اشتہاریوں کو گرفتار کرلیا۔ جن کی گرفتاری سے علاقہ میں امن و امان کی حقیقی فضا ء قائم ہوگی اور پولیس پر عوام کا اعتماد بحال ہوگا۔