لاہور: ڈی جی ایل ڈی اے کی زیرصدارت اہم اجلاس، اہم فیصلےاوراہم منصوبے بھی زیربحث آئے،اطلاعات کےمطابق لاہور ڈویلپمنٹ اتھارٹی کے ڈائریکٹر جنرل ایل ڈی اے سمیر احمد سید کی زیر صدارت منعقدہ ڈویلپمنٹ ورکنگ پارٹی کے اجلاس میں فردوس مارکیٹ گلبرگ کے قریب انڈر پاس کی تعمیر اور جوہر ٹاﺅن میں اینٹرٹینمنٹ پارک کے قیام کے منصوبوں کوعمل درآمد کے لئے کلیئر کر دیا گیا۔
لاہور کی ترقی کے حوالے سے اجلاس کوبتایاگیا کہ سنٹر پوائنٹ گلبرگ سے ایم ایم عالم روڈ اور کیولری گراﺅنڈ کی طرف جانے والی ٹریفک کی سہولت کے لئے فردو س مارکیٹ چوک میں ایک ارب 80کروڑ روپے کی لاگت سے انڈر پاس کی تعمیر کامنصوبہ مکمل کیاجائے گا۔یہ دو رویہ انڈر پاس 540 میٹرطویل اور دونوں طرف سے دو دو لینز پر مشتمل ہوگا۔یہاں سے بارشی پانی کے اخراج کے لئے خصوصی اقدامات کئے جائیں گے۔
منصوبے کے لئے تقریباً سات کنال اراضی بھی ایکوائر کی جائے گی اور اس کی تعمیر سے فردوس مارکیٹ چوک میں واقع کوئی عمارت متاثر نہیں ہوگی۔اجلاس کو بتایا گیا کہ جوہر ٹاﺅن میں علیم ڈارکرکٹ اکیڈمی سے ملحقہ 140کنال اراضی پر 33کروڑ روپے کی لاگت سے لاہور کا پہلا اینٹر ٹینمنٹ پارک تعمیر کیاجائے گا۔
یہاں جوگنگ ٹریک، جھیل،جم،باسکٹ بال کورٹ،ٹینس کورٹ،منی گالف کلب اوردیگرآﺅٹ ڈور کھیلوں کی سہولتیں مہیا کی جائیں گیئں۔ڈویلپمنٹ ورکنگ پارٹی کے اجلاس میں چیف انجینئر حبیب الحق رندھاوا،پراجیکٹ ڈائریکٹر عبد الرزاق چوہان اور اقرار حسین، صوبائی محکمہ فنانس اورپی اینڈ ڈی اورمنصوبوں کے کنسلٹنٹس کے نمائندوں نے بھی شرکت کی.
