حکومت کے قرض میں اضافے کو شہباز شریف نے معاشی قیامت قرار دے دیا

حکومت کے قرض میں اضافے کو شہباز شریف نے معاشی قیامت قرار دے دیا

‎پاکستان مسلم لیگ (ن) کے صدر اور قائد حزب اختلاف شہبازشریف کا وفاقی حکومت کے قرض میں ہوشربا اضافے پر اظہارتشویش کیا ہے . رواں مالی (فسکل) سال کے صرف 7 ماہ میں وفاقی حکومت کے قرض میں 1.210 ٹریلین سے 32.997 ٹریلین کا اضافہ معاشی قیامت ہے ،‎موجودہ حکومت کا معاشی تباہی کا ایجنڈا ملک وقوم کے لئے خوفناک پیغام ہے .‎طویل اور قلیل المدتی ڈومیسٹک قرض میں 10 فیصد اضافہ معاشی تباہی اور بربادی کا اعلان ہے

انہوں نے کہا کہ ‎قلیل المدتی غیرملکی قرض 126.9 ارب سے 641.9 ارب پر پہنچنا غلط معاشی حکمت عملی کا ثبوت ہے .‎حکومت دو دھاری تلوار سے پاکستان کی معیشت کی شہہ رگ کاٹ رہی ہے .‎سود کی انتہائی زیادہ شرح سے کاروباری پہیہ رُک چکا ہے تو دوسری جانب پاکستان پر ادائیگیوں کا بوجھ دن بدن بڑھ رہا ہے .‎اس صورتحال میں صرف اللہ تعالی سے رحم کی دعا ہی کی جاسکتی ہے .‎سٹاک مارکیٹ کا ایک دن میں 6 فیصد سے زیادہ گرنے کا مطلب نہ سمجھا گیا تو ناقابل تلافی نقصان ہوگا

شہباز شریف کا کہنا تھا کہ ‎کورونا وائرس، عالمی معاشی صورتحال اور پاکستان کے اندر سوئی حکومت ملک کے لئے معاشی تباہی کا سونامی لائے گی ،‎معاشی جہاز آٹو پائلٹ پر ہچکولے کھارہا ہے، کسی بھی وقت گرگیا تو کچھ نہیں بچے گا

ان کا کہنا تھا کہ ‎حالات کی سنگینی پر ہوش کے ناخن لینے کے بجائے حکومت آٹا، چینی ، پٹرول، دوائی اور ڈالر پر پیسہ کمانے میں مصروف ہے ،حکمرانوں کی معیشت دن بدن بہتر اور ملک وقوم کی معیشت ہر روز تباہ وبرباد ہورہی ہے .‎معیشت کے لئے بڑھتے خطرات پاکستان کی سلامتی کے لئے خطرہ ہیں