وزیراعظم اوران کی ٹیم کورونا سے پیدا ہونے والی تمام صورتحال کومسلسل مانیٹرکررہے ہیں، فردوس عاشق اعوان
باغی ٹی وی : فردوس عاشق اعوان نے کہا ہے کہ وزیراعظم عمران خان اوران کی ٹیم کورونا سے پیدا ہونے والی تمام صورتحال کومسلسل مانیٹرکررہے ہیں۔
وفاقی کابینہ کے اجلاس کے بعد ذرائع ابلاغ کے نمائندوں کو بریفنگ دیتے ہوئے انہوں نے کہا کہ اجلاس کوکورونا وائرس کے پھیلاو کو روکنے کے لیے حکومتی اقدامات سے آگاہ کیا گیا۔
انہوں نے کہا کہ موجودہ صورت حال کے مطابق بروقت اقدامات کررہے ہیں۔ وزیراعظم عمران نے کہا کورونا سے نمٹنے کے لیے پرعزم ہیں۔ کابینہ نے وزیراعظم عمران خان کے اقدامات کو سراہا
معاون خصوصی نے کہا کہ اقتصادی پیکج کا مقصد کورونا وبا میں مبتلا متاثرین کی مدد ہے۔ وزیراعظم کی ہدایت پر مشیر خزانہ پیکج کی تفصیلات سے آگاہ کریں گے۔ معاشی پیکج پاکستان کے عوام کی مشکلات کم کرے گا۔
ڈاکٹر فردوس عاشق اعوان کا کہنا تھا کہ مزدور طبقے کے لئے 200 ارب اور معاشرے کے انتہائی غریب افراد کے لئے 150 ارب کی رقم رکھی گئی ہے، برآمد کنندگان کو 100 ارب روپے کا فوری ریفنڈ دینے سے برآمد کنندگان کی مدد ہوگی اور اس سے ملکی معیشت پر اچھے اثرات مرتب ہوں گے۔
معاون خصوصی برائے اطلاعات و نشریات کا کہنا تھا کہ چھوٹی بڑی صنعتوں اور زراعت کے لئے 100 ارب سے پیداواری صلاحیت بڑھانے میں مدد ملے گی، یوٹیلٹی سٹورز کے لئے 50 ارب روپے کی رقم کا مقصد عوام کو سستی اور معیاری اشیاء کی فراہمی یقینی بنانا ہے۔
انہوں نے مزید کہا کہ لاک ڈاؤن کی صورتحال کے لئے100 ارب اور گندم کی سرکاری خریداری کے لئے 280 ارب روپے رکھے گئے ہیں۔ پٹرولیم مصنوعات پر15روپے فی لیٹرکم کر دیئے ہیں، ان تمام اقدامات سے واضح ہوتا ہے کہ وزیراعظم عمران خان کی حکومت ہر وقت عوام کے لئے سوچتی ہے، ملک و قوم کی فلاح و بہبود اور ان کی بہتری ہی ہمارا مقصد ہے۔
