کورونا وائرس سے لڑنے والوں کو 10 ہزار حفاظتی لباس اور 10 ہزار ماسک دے رہے ہیں۔ شہبازشریف
باغی ٹی وی : پاکستان مسلم لیگ(ن) کے صدر اور قائد حزب اختلاف شہبازشریف کا سابق مئیرز اور ڈسرکٹ چیرمینز سے ویڈیو لنک پہ اجلاس شروع ہوا جس میں شہباز شریف نے کہا کہ آج ہم ایک ایسے موقع پرجمع ہیں جب پوری انسانیت ایک کڑے امتحان سے گزر رہی ہے۔ یہ ان کی زندگی اور بقاءکا مشکل ترین مرحلہ ہے جس میں پوری انسانیت کا اتحاد درکار ہے۔ ہم کورونا کی وجہ سے جاں بحق ہونے والوں کے لئے دلی تعزیت کرتے ہیں۔ان کے گھر والوں سے اظہار افسوس اور ہمدردی کرتے ہیں۔ آج اتحاد، احتیاط اور خدمت سے ہی بچا جاسکتا ہے۔ کوئی فرد تنہاءکچھ نہیں کرسکتا۔
شہباز شریف نے کہا کہ پاکستان مسلم لیگ (ن) نے اپنی قومی، ملی، جمہوری و آئینی ذمہ داری سمجھتے ہوئے اقدامات کا آغاز کیا۔ ہمارے سامنے اس وقت بڑا مقصد قومی بقاءاور سلامتی کا ہے۔ ہم نہیں چاہتے کہ حکومت کی حماقتوں کی سزا پاکستان کی باغیرت اور باعزت قوم کو ملے۔ قومی اتحاد، یک جہتی اور قائد اعظم کی بصیرت پر چلتے ہوئے ہم نے قومی لائحہ عمل تیار کیا۔ اس قومی لائحہ عمل کو پوری اپوزیشن نے منظور کیا جسے ہم نے حکومت کو پیش کیا ہے
انہوں نے کہا کہ ہم نے مطالبہ کیا ہے کہ حکومت ملک وقوم کے اس مشکل ترین وقت میں ہماری دی ہوئی سفارشات پر عمل کرے . میں نے لاک ڈاون کی اہمیت کو بیان کرنے کے علاوہ اس دوران خوراک اور ادویات کی ترسیل کا پروگرام بھی پیش کیا ہے . ہم نے عوام کی براہ راست مدد کرنے کی حکمت عملی بھی وضع کی ہے۔ میں نے پارٹی کے منتخب اور تنظیمی عہدیداروں اور کارکنان کو یہ ذمہ داری سونپی ہے . عوامی حکمت عملی کے تحت ہم نے کورونا سے بچاو کے لے احتیاطی تدابیر سے آگاہ کرنا ہے . آگہی مہم کے ساتھ ساتھ خوراک، ادویات اور دیگر ضروریات کی فراہمی میں ہاتھ بھی بٹانا ہے . نبی کریم کے امتی ہونے کے جذبے سے ہم نے اپنے ارد گرد نادار، بے روزگار، دیہاڑی دار، کمزور، بیواوں، یتیموں اور مستحقین وسفید پوش بھائیوں، بہنوں، بچوں ، ضعفیوں کی مدد کرنا ہے۔
انہوں نےکہا کہ لاک ڈاون کی صورتحال میں ہم نے ان کو بے یارو مددگار نہیں چھوڑنا۔ ان کا دست وبازو بننا ہے۔ میں اپنے تجربے کی بنیاد پر کہہ سکتا ہوں کہ جب تک آپ ساتھ نہیں دیں گے، آپ فعال اور متحرک نہیں ہوں گے، اس جنگ کو ہم جیت نہیں سکتے۔ جس طرح ڈاکٹرز، نرسز اور طبی عملہ فرنٹ لائن سولجر ہیں۔ آپ ان کے شانہ بشانہ اسی ہراول دستے کا ایک قابل فخر حصہ ہیں۔ ہم 10 ہزار حفاظتی لباس اور 10 ہزار ماسک دے رہے ہیں۔ پہلی کھیپ گزشتہ روز ہم نے حوالے کردی ہے ۔ ڈاکٹرز، نرسز اور طبی عملے کی حفاظت اولین ترجیح ہونا چاہئے کیونکہ وہ بحفاظت ہوں گے تو انسانوں کی زندگیاں بچا سکیں گے۔
شہباز شریف کا کہنا تھا کہ ہم اپوزیشن میں ہوتے ہوئے بھی اپنے ان بچوں اور بچیوں کی ہر ممکنہ مدد کرتے رہیں گے۔ آئیے ہم سب ایک بنیں۔ قوم کا بازو بنیں . میں آپ کے ساتھ مسلسل رابطے میں رہوں گا۔ تمام کاوشوں کی نگرانی کا فرض ادا کرتا رہوں گا اور اپنی تجاویز اور سفارشات بھی آپ کی خدمت میں پیش کرتا رہوں گا۔ اس وقت کورونا موت بن کر ہمارے گھروں کے دروازے پر دستک دے رہا ہے۔ آئیے ہم اپنی قوم کی حفاظت کے لئے اپنا تاریخی کردار ادا کریں۔ اللہ تعالی کے فضل وکرم سے ہم نے پہلے بھی ڈینگی، پولیو سمیت کئی قدرتی آفات اور چیلنجز کا مقابلہ کیا اور سرخرو ہوئے۔ ایک مرتبہ پھر رب کریم ہماری مدد فرمائے گا اور ہم اس مشکل سے بھی نجات پائیں گے۔ ان شاءاللہ
