محکمہ موسمیات نے خطرے کی گھنٹی بجا دی ، شہری رہیں محتاط
باغی ٹی وی :موسم کے حوالے سے سخت دنوں کی پیش گوئی کی گئی ہے . محکمہ موسمیات نے آئندہ ہفتے شہر قائد میں موسم گرم رہنے کی پیش گوئی کردی ہے اور 5 سے 8 مئی تک درمیانے درجے کی ہیٹ ویو کا امکان ظاہر کیا گیا ہے۔
اس دوران پارہ 40 ڈگری سینٹی گریڈ سے 42 ڈگری سینٹی گریڈ تک جاسکتا ہے۔
ماہرین ماحولیات کے مطابق گزشتہ سالوں میں درجہ حرارت تو 42 سے 45 ڈگری سینٹی گریڈ تک محدود رہا ہے لیکن شہر قائد کے بلند و بالا عمارتوں درمیان گھرے ہونے کے باعث گرمی کی شدت میں اضافہ محسوس ہوتا ہے
ماہرین صحت نے ان چار دنوں کے دوران شہریوں کو بلاضرورت گھروں سے نہ نکلنے کا مشورہ دیا ہے۔
ماہرین صحت کا کہنا ہے کہ گھر سے مجبوری میں نکلنا بھی پڑے تو احتیاطی تدابیر ضرور اختیار کریں جیسا کہ سر پرکپڑا اوڑھنا، چھتری کے استعمال کو یقینی بنانا وغیرہ۔یہ پہلی بار نہیں ہوا کہ کراچی میں ہیٹ ویو کی پیش گوئی کی گئی، شہر قائد کو گزشتہ چار سالوں میں گرم موسم کا سامنا رہا ہے۔
موسم کا حال بتانے والوں کا مزید کہنا ہے کہ آج شہر کا موسم گرم اور مرطوب رہے گا،آج زیادہ سے زیادہ درجہ حرارت 35سے 37ڈگری سینٹی گریڈ تک جانے کا امکان ہے۔
محکمہ موسمیات کے مطابق،شہر کا موجودہ درجہ حرارت 32 ڈگری سینٹی گریڈ ریکارڈ کیا گیاجبکہ کم سے کم درجہ حرارت27ڈگری سینٹی گریڈ ریکارڈ کیا گیا،مغربی سمت سے چلنے والی ہوائیں 22 کلو میٹر فی گھنٹہ کی رفتار سے چل رہی ہیں،ہوا میں نمی کا تناسب 63فیصد ہے
سال 2015 میں شہر قائد کو بدترین ہیٹ ویو کا سامنا کرنا پڑا تھا جہاں 12 سو سے زائد افراد لقمہ اجل بن گئے تھے۔ ملیر میں 197 ، گلبرگ میں 101 ، گلشن اقبال میں 84 افراد ہیٹ ویو کا نشانہ بنے تھے۔۔ لیاری، کورنگی، نارتھ ناظم آباد، شاہ فیصل اور لیاقت آباد کے علاقے بھی شدید متاثر ہوئے تھے
