مکی آرتھر اگلے دو سال تک اپنے عہدے پر برقرار رہنے کے خواہش مند

قومی ٹیم کے ہیڈ کوچ مکی آرتھر کہتے ہیں کہ پاکستان کرکٹ کیلیے کام کرتے ہوئے بہت اچھا وقت گزارا ہے، پاکستان کی عوام نے بہت پیار دیا، اس دوران کئی اچھے اور برے وقت بھی آئے، ہم نے چند یادگار فتوحات سمیٹیں، اب مستقبل کا فیصلہ مجھے اور پی سی بی کو کرنا ہوگا۔
جب ان سے ورلڈ کپ کے سیمی فائنل تک نہ پہنچ پانے کا سوال کیا گیا تو انھوں نے کہا کہ مجھے آئی پی ایل میں بھی کام کرنے کی پیشکش کی گئی ہے لیکن میں سمجھتا ہوں کہ پاکستان ٹیم کے ساتھ میرا مشن ابھی پورا نہیں ہوا ہے۔ ہم ٹیم کا نیا ٹیلینٹ دکھانے میں کامیاب ہوئے تاہم کچھ اہداف مزید حاصل کیے جا سکتے ہیں، مجھے اگر موقع دیا جائے تو اگلے 2 سال پاکستانی کرکٹ کیلیے کام کرنا چاہوں گا، اور اگر ایسا نہ ہوا تو مجھے مایوسی ہوگی۔

مکی آرتھر نے مزید کہا کہ ہم بنگلہ دیش کے خلاف بھی عمدہ کارکردگی دکھانے کی صلاحیت رکھتے ہیں، اگلے مقابلوں میں فتح کیلیے کوشش کرسکتے ہیں، امید ہے کہ نیوزی لینڈ انگلینڈ کو شکست دے۔ پھر پاکستان بھی بنگلہ دیش کو ہرانے میں کامیاب ہوجائے۔

مکی آرتھر نے کہا کہ بنگلادیش کے خلاف جارحانہ کھیل پیش کرنا ہوگا. اوپنرز سے امید ہے کہ اچھا سکور کریں اور بالز شکیب الحسن اور تمیم اقبال کو جلدی آؤٹ کرنے کی کوشش کریں.

محمد حسنین جیسے فاسٹ باؤلر کو نظر انداز کرنے کے سوال پر انھوں نے کہا کہ محمد حسنین کو نظر انداز نہیں کر رہے، ہم ان کو مستقبل کیلیے گروم کررہے ہیں، اس سے قبل شاہین شاہ آفریدی کو بھی قومی ٹیم کیلیے تیار کیا گیا تھا۔