لاہور: جہانگیر ترین برطانیہ میں کہاں مقیم ہیں؟ انکشافات سے بھری اہم خبرآگئی ،اطلاعات کے مطابق پی ٹی آئی رہنما جہانگیر ترین سے متعلق انکشاف ہوا ہے کہ وہ ان دنوں برطانیہ میں اپنے فارم ہاؤس میں مقیم ہیں۔
ذرائع کے مطابق چینی اسکینڈل میں نام آنے کے بعد جہانگیر ترین بیرون ملک چلے گئے تھے، معلوم ہوا ہے کہ وہ لندن سے کچھ فاصلے پر نیوبری میں اپنے ہائیڈ ہاؤس نامی فارم ہاؤس رہائش پذیر ہیں۔
جہانگیر ترین کے ساتھ ان کے صاحب زادے علی ترین بھی اسی فارم پر موجود ہیں، انھوں نے رواں ہفتے بیٹے کے ہمراہ سوئٹزرلینڈ کا بھی دورہ کیا۔
پی ٹی آئی رہنما کا ہائیڈ ہاؤس 9.93 ایکڑ پر محیط ہے، اس فارم ہاؤس میں ایک درجن ملازم اور گھوڑے بھی موجود ہیں، یہ ہائیڈ ہاؤس لندن سے ڈیڑھ گھنٹے کے فاصلے پر واقع ہے۔
ذرائع کا کہنا ہے کہ جہانگیر ترین نے لندن میں ن لیگ سے رابطوں کی سختی سے تردید کی ہے، مقامی برطانوی میڈیا نے جہانگیر ترین سے ملنے کی کوشش بھی کی لیکن وہ نہیں ملے۔
یہ افواہیں بھی پھیلی ہوئی تھیں کہ شاید وہ پی ٹی آئی سے ناراضی کی وجہ سے مسلم لیگ ن کے رہنماؤں سے ملاقاتیں کر رہے ہیں، تاہم جمعے کے روز پاکستان میں اپنے قریبی دوست سے فون پر بات کرتے ہوئے انھوں نے اس افواہ کی سختی سے تردید کی۔
انھوں نے کہا کہ نہ تو وہ کسی ن لیگی رہنما سے ملنا چاہتے ہیں نہ ہی ایسی کوئی کوشش کی گئی ہے، پی ٹی آئی کی میں نے اپنے ہاتھوں سے تعمیر کی ہے، کچھ معاملات ضرور ہیں جو جلد حل ہو جائیں گے۔
