یڈکوارٹرز پاکستان رینجرز(سندھ)مورخہ 4 جولائی2020: پاکستان رینجرز(سندھ) اور پولیس نے انٹیلی جنس معلومات کی بنیادپر مشترکہ کارروائی کر تے ہوئے ٹارگٹ کلنگ میں ملوث 2ملزمان کو گرفتار کر لیا، تفصیلات کے مطابق مورخہ 2 جولائی 2020کو کراچی کے علاقے لیاقت آباد نمبر 10میں PSPکے کارکن عاصم محمد خان کو قتل کر دیا گیا تھا۔
قتل کی ایف آئی آر پولیس اسٹیشن شریف آباد میں نامعلوم ملزما ن کے خلاف درج کی گئی تھی۔ واقعہ کی اطلاع ملتے ہی پاکستان رینجرز (سندھ) نے تحقیقات کے لئے خصوصی ٹیم تشکیل دی، اس اندھے قتل میں ملوث ملزمان سیدنعیم حیدر عرف بڑا اور محمد دانش اقبال عرف ہکلہ کو 48گھنٹے سے کم وقت میں گرفتار کر لیا جبکہ ملزمان کا تیسرا ساتھی موقع سے فرار ہو گیا جس کی گرفتاری کے لئے چھاپے مارے جارہے ہیں، ملزمان کے قبضے سے قتل کی واردات میں استعمال ہونے والا 30بورپسٹل بھی برآمد کر لیا ہے، جس کی فرانزک رپورٹ موقع واردات سے ملنے والے خول سے تصدیق ہوگئی ہے۔
ابتدائی تفتیش کے دوران ملزم سیدنعیم حیدر عرف بڑا نے انکشاف کیا کہ اس کا تعلق کالعدم تنظیم سے ہے اور وہ اس سے قبل بھی فرقہ ورانہ ٹارگٹ کلنگ میں ملوث رہا ہے۔گرفتارملزمان کو قانونی کارروائی کیلئے پولیس کے حوالے کر دیا گیا ہے۔ عوام سے اپیل ہے کہ ایسے عناصر کے بارے میں اطلاع فوری طور پر قریبی چیک پوسٹ،رینجرز ہیلپ لائن 1101 یا رینجرز مددگار واٹس ایپ نمبر0347-9001111 پر کال یا ایس ایم ایس کے ذریعے دیں۔آپ کا نام صیغہ راز میں رکھا جائے گا۔
