اسلام آباد : تعلیمی اداروں میں انٹرنیٹ کی آسان اورسستی سہولت کو یقینی بنایا جائے ،وزیراعظم کا حکم،اطلاعات کےمطابق پاکستان میں وزیر اعظم عمران خان نے اسکولوں میں، انٹرنیٹ کی آسان اور سستی فراہمی کی ہدایت جاری کی ہے۔
پاکستانی میڈیا کے مطابق جمعرات کو وزیر اعظم عمران خان نے ملک میں انٹرنیٹ کوریج بڑھانے اور بہتر کرنے کے بارے میں ایک اجلاس کی صدارت کی۔
رپورٹ کے مطابق وزیر اعظم عمران خان نے اجلاس سے خطاب میں ہدایت دی کہ اسکولوں میں انٹرنیٹ کی آسان اور سستی فراہمی سے متعلق ضروری اقدامات کئے جائیں۔
انہوں نے کہا کہ موجودہ دور میں انٹرنیٹ تک دسترسی ایک ضرورت بن چکی ہے۔ انہوں نے کہا کہ ملک کے پسماندہ علاقوں، بالخصوص بلوچستان، سندھ کے دور دراز کے علاقوں اور اسی طرح انضمام شدہ علاقوں میں انٹرنیٹ کی فراہمی اور بہتر کوریج پر توجہ دی جائے۔
اس اجلاس میں وزیر اعظم عمران خان کو ملک بھر میں بالخصوص دور دراز اور انضمام شدہ علاقوں میں انٹرنیٹ کی صورتحال کے بارے میں بریفنگ دی گئی۔
