کورونا کی صورت حال پر وزیراعظم کا قوم کو اعتماد میں‌ لینے کا فیصلہ

کورونا کی صورت حال پر وزیراعظم کا قوم کو اعتماد میں‌ لینے کا فیصلہ

باغی ٹی وی :وزیراعظم نے کورونا صورتحال پر قوم کو اعتماد میں لینے کا فیصلہ کرلیا، عمران خان کورونا سے متعلق اجلاس کے بعد قوم سے مخاطب ہوں گے۔ وزیراعظم سمارٹ لاک ڈاؤن پالیسی کی عالمی دنیا میں پذیرائی پر بات کریں گے۔

وزیراعظم عمران خان نے کورونا صورتحال پر اہم اجلاس آج طلب کر لیا، صوبوں میں کورونا صورتحال اور حکومتی اقدامات سے متعلق آگاہ کیا جائے گا۔

ذرائع کے مطابق اجلاس میں عید الاضحی کیلیے ایس او پیز پرعمل درآمد کی حکمت عملی طے کی جائے گی، ہسپتالوں میں مریضوں کی تعداد اور سہولیات سے آگاہ کیا جائے گا۔ اجلاس میں این سی او سی کے اعدادو شمار اور تجاویز پر بریفنگ ہوگی، تعلیمی ادارے کھولنے سے متعلق این سی او سی کی تجاویز پر غور ہوگا۔

ذرائع کے مطابق اجلاس میں وفاقی وزرا، معاونین، سول اور عسکری اداروں کے اعلیٰ حکام شرکت کریں گے، صوبائی وزرائے اعلیٰ ویڈیو لنک کے ذریعے اجلاس میں شرکت کریں گے،
واضح‌ رہے کہ پاکستان میں کورونا سے اموات کی مجموعی تعداد 5 ہزار 842 ہو گئی ہے اور 2 لاکھ 73 ہزار 113 افراد متاثر ہیں جبکہ ملک بھر میں کورونا کے دو لاکھ 37 ہزار 434 مریض صحت یاب ہوچکے ہیں۔

پاکستان میں کورونا کیسز کی تعداد تیزی سے کم ہو رہی ہے اور نیشنل کمانڈ اینڈ آپریشنل سینٹر کی جانب سے جاری اعداد و شمار کے مطابق اس وقت ملک بھر میں کورونا کے ایکٹیو کیسز کی تعداد 27 ہزار421 ہے۔

گزشتہ 24 گھنٹے کے دوران 23 ہزار 254 ٹیسٹ کیے گئے۔ ملک بھر میں مجموعی طور پر کورونا کے 18 لاکھ 68 ہزار 180 ٹیسٹ کیے جا چکے ہیں۔