سوشانت سنگھ کی خودکشی کے بعد اب معروف بھارتی اداکارہ وجیا لکشمی کی خودکشی کی کوشش کرنے کی خبر نے مداحوں کو افسردہ کردیا ہے-
باغی ٹی وی : گذشتہ ماہ 14 جون کوبالی وڈ اداکار 34 سالہ سوشانت سنگھ راجپوت نے ڈپریشن کی وجہ سے ممبئی کے علاقے باندرہ میں واقع اپنے فلیٹ میں خودکشی کر لی تھی سوشانت سنگھ راجپوت کی خودکشی نے سب کو ہلا کر رکھ دیا تھا اور سوشل میڈیا پر بھی ہنگامہ مچ گیا تھا اور پولیس تاحال ان کی خودکشی کے معاملے کی تفتیش جاری رکھے ہوئے ہیں۔
اگرچہ پوسٹ مارٹم اور اب تک کی رپورٹس سے یہ ثابت ہوچکا ہے کہ سوشانت سنگھ راجپوت نے خودکشی ہی کی تھی تاہم پولیس یہ جاننے کی کوشش کر رہی ہے کہ ایسے کیا اسباب تھے جن کی وجہ سے اداکار یہ قدم اٹھانے پر مجبور ہو گئے تھے-
اب تک سوشانت سنگھ راجپوت کی خودکشی کا معاملہ سلجھ نہیں پایا کہ ایک اور خبر نے بھارتی شوبز انڈسٹری میں بھارتی اداکارہ وجیا لکشمی نے ہراساں کیے جانے پر خود کشی کی کوشش پر ایک نئی بحث کو چھیڑ دیا ہے-
بھارتی اخبار انڈیا ٹوڈے کے مطابق تامل شوبز انڈسٹری کی مقبول اداکارہ وجیا لکشمی کی جانب سے اپنی زندگی کے خاتمے کی کوشش کی خبر نے سب کو پریشان کردیا اور لوگ اداکارہ کو ہراساں کرنے والی بااثر شخصیات کی گرفتاری کا مطالبہ کر رہے ہیں۔
رپورٹ کے مطابق اداکارہ نے خودکشی کی کوشش سے قبل اپنے فیس بک اکاؤنٹ پر چند ویڈیوز شیئر کرکے سنگین قدم اٹھانے کی وضاحت کرتے ہوئے الزام لگایا کہ نام تمیجھر پارٹی کے رہنما سیمان اور پنانکتو پدائی کے ہری نادر کے کارکنوں کی طرف سے ہراساں کیے جانے نے انہیں انتہائی اقدام اٹھانے پر مجبور کردیا۔
وجیا لکشمی نے اپنی ویڈیو میں بتایا کہ دونوں سیاسی رہنماؤں نے نہ صرف میڈیا میں ان کی تضحیک کی بلکہ وہ انہیں آن لائن ہراساں بھی کرتے رہے ہیں۔
اداکارہ نے الزام عائد کیا کہ دونوں بااثر رہنماؤں کی جانب سے ہراساں کئے جانے کی وجہ سے وہ پچھلے 4 مہینوں سے شدید ڈپریشن میں مبتلا ہوگئیں میں نے اپنے خاندان کے لئے زندہ رہنے کی پوری کوشش کی لیکن اب وہ مزید ٹارچر نہیں سہہ سکتیں-
وجیا لکشمی نے ایک اور ویڈیو میں بتایا کہ انہوں نے بلڈ پریشر کم کرنے والی گولیاں کھائی ہیں، جس کے بعد اب ان کا بلڈ پریشر انتہائی کم ہوجائے گا، جس کے بعد ان کی موت واقع ہوجائے گی۔
ساتھ ہی اداکارہ نے ویڈیو میں حکومت، انتظامیہ اور مداحوں سے اپیل کی کہ انہیں ہراساں کرنے والے سیاسی رہنماؤں کے خلاف ایسی کارروائی کی جائے کہ ان کی خودکشی مثال بن جائے۔
اخبار کے مطابق اداکارہ کی ویڈیو وائرل ہونے کے بعد فوری طور پر انہیں گھر سے ہسپتال منتقل کیا گیا اور اب چنائی کے ایک نجی ہسپتال میں ان کا علاج کیا جا رہا ہے۔
تازہ رپورٹس کے مطابق اداکارہ کی حالت خطرے سے باہر ہے تاہم اب بھی وہ ہسپتال میں زیر علاج ہیں اور مزید ایک یا دو دن تک انہیں ہسپتال میں رکھے جانے کا امکان ہے۔
اداکارہ کی جانب سے خودکشی کرنے کی کوشش کے بعد تامل ناڈو میں سوشل میڈیا پر لوگ حکومت سے دونوں سیاسی رہنماؤں کے خلاف ایکشن لینے کا مطالبہ کر رہے ہیں تاہم تاحال ان کے خلاف کسی کارروائی کی کوئی اطلاعات نہیں ہیں-
