پشاور : لاہور، اسلام آباد، سوات سمیت ملک بھرکے اہم شہروں میں رہائشیں رکھنے والے ن لیگی رہنما امیرمقام کی مالمہ جبّہ والی رہائش میں آتشزدگی،اطلاعات کے مطابق پاکستان مسلم لیگ (ن) خیبرپختونخوا کے صدر انجینئرامیرمقام کی ضلع سوات کے علاقے مالم جبہ میں رہائش گاہ شارٹ سرکٹ کے باعث لگنے والے آگ سے خاکستر ہوگئی تاہم کوئی جانی نقصان نہیں ہوا۔
سماجی رابطے کی ویب سائٹ ٹوئٹر پراپنے بیان میں امیرمقام نے واقعے کی تصدیق کرتے ہوئے کہا کہ ‘مالم جبہ میں میری رہائش گاہ میں شارٹ سرکٹ کی وجہ سےآگ لگی اور عمارت مکمل طور پرجل کر خاکستر ہوگئی’۔مالم جبہ میں امیر مقام کی رہائش گاہ میں پاکستان پیپلزپارٹی کے رہنما اور سابق ڈپٹی اسپیکر فیصل کریم کنڈی اور دیگر مہمان ٹھہرے ہوئے تھے۔
سماجی رابطے کی ویب سائٹ ٹوئٹر پراپنے بیان میں امیرمقام نے لکھا کہ ‘اللہ رب العزت کا شکر گزارہوں کہ فیصل کریم کنڈی اور دیگرمہمان جو وہاں موجود تھے، محفوظ رہے اور کوئی جانی نقصان نہیں ہوا’۔امیرمقام کا کہنا تھا کہ ‘بنگلے اور مکان تو پھر بھی بن جاتے ہیں لیکن انسان دوبارہ نہیں آسکتے’۔رپورٹ کے مطابق عمارت کے جس حصے پر آگ لگی تھی وہ لکڑی سے بنا ہوا تھا۔
آگ لگنے کی اطلاع ملتے ہی ریسکیو 1122 اورمقامی افراد نے فوری طورپر پہنچ کر امدادی کام شروع کردیا اور دو گھنٹوں کی طویل جدوجہد کے بعد آگ کو بجھا دیا گیا۔
