بونیر :ٹرمپ گیا تو عمران خان بھی چلاجائے گا،پی ڈی ایم دھوکے بازوں کا ٹولہ:اطلاعات کے مطابق امیر جماعت اسلامی پاکستان سینیٹر سراج الحق کا کہنا ہے کہ وزیراعظم عمران خان نے عوام سے جھوٹے وعدے کیے۔ اگر جھوٹوں کا عالمی مقابلہ ہوتو عمران خان بغیر کسی مقابلے ورلڈ کپ جیت سکتے ہیں۔ عمران خان نے عوام کو دھوکہ دیا۔
بونیر میں مہنگائی کے خلاف جلسے سے خطاب کرتے ہوئے سینیٹر سراج الحق نے کہا کہ عمران خان جب وزیراعظم بنے تو کہا تھا کہ جس دن عوام میری حکومت کے خلاف سڑکوں پر آئے اسی دن وزارت عظمیٰ سے مستعفی ہوکر گھر چلا جاؤں گا۔ آج عمران خان کی غریت کا امتحان ہے کہ وہ گھر جاتے ہیں یا ایک اور یوٹرن لے کر حکومت میں رہتے ہیں۔
سراج الحق نے کہا کہ عمران خان اپنے انٹیلی جنس اداروں سے معلوم کرلیں اور جلسے کی تصاویر بھی دیکھ لیں۔ آج عوام نے آپ پر عدم اعتماد کردیا ہے۔ آپ کو اب مستعفی ہو جانا چاہیے۔
پاکستان ڈیموکریٹک موومنٹ کے حوالے سے سراج الحق نے کہا کہ پی ڈی ایم کا اپنا بیانیہ اور تحریک انصاف کا اپنا بیانیہ ہے لیکن جماعت اسلامی کا بیانیہ ایک ہی ہے کہ پاکستان میں اللہ کا نظام چلے گا۔ اللہ کے نظام کے علاوہ امریکا، انگریزوں، جاگیرداروں اور کرپٹ لوگوں کا نظام برداشت نہیں کریں گے۔
امیر جماعت اسلامی سینیٹر سراج الحق کا کہنا ہے کہ وزیراعظم کا دوست ڈونلڈ ٹرمپ چلا گیا ہے، اب عمران خان کے جانے کی باری ہے۔
ان کا کہنا تھا کہ حکومت نے ایک وعدہ بھی پورا نہیں کیا، جھوٹ کا ورلڈ کپ ہو جائے تو وزیراعظم جیت لیں گے۔
انہوں نے کہا کہ پی ٹی آئی بھی گزشتہ حکومتوں کا تسلسل ہے، پی ٹی آئی نے عوام کا خون نچوڑا، کشمیری شہداء سے غداری کی اور ہمارے کلچر کو تباہ کیا۔
سراج الحق نے کہا کہ آپ کب تک لوگوں کو دھوکا دیں گے، گورنر ہاؤس کو یونیورسٹی اور 50 لاکھ گھر بنانے کا وعدہ کیا تھا، یہ حکمران پی پی اور مسلم لیگ کا تحفہ ہیں، دونوں جماعتوں کے لوگ ہی پی ٹی آئی میں ہیں۔
امیر جماعت اسلامی کا کہنا تھا کہ میرا مسئلہ نیب کا نہیں ہے، پوری قوم کو جدوجہد کے لئے تیار رہنا چاہیے، موقع ملا تو نیب کے لوگوں کو بھی جیل میں ڈالوں گا۔
