ماہرہ خان، ایمن خان اور عاطف اسلم ایشیا پیسیفک کے 100 بااثر ترین ڈیجیٹل اسٹارز کی فہرست میں شامل ہوگئے۔
باغی ٹی وی : امریکی جریدے فوربز نے رواں سال ایشیا پیسیفک کے 100 بااثر ترین فنکاروں کی فہرست جاری کی ہے۔ جن کے سوشل میڈیا پر نہ صرف لاکھوں کی تعداد میں فالوورز ہیں ان کو ان کے کام، ان کی جانب سے انسانی حقوق پر واضح مؤقف، معاشرے میں بہتری لانے کی کاوشوں اور ان کے اقدامات کے معاشرے پر پڑنے والے اثرات کا جائزہ لے کر انہیں فہرست کا حصہ بنایا گیا ہے۔
100ڈیجیٹل اسٹارز کی ’فوربز‘ کی پہلی فہرست میں مجموعی طور پر ایشائی ممالک کی 100 شوبز، فیشن، ٹیکنالوجی، اسپورٹس و لگژری برانڈز کی ایسی شخصیات کو شامل کیا گیا ہے جو سوشل میڈیا پر اپنی پوسٹس سے سماج اور لوگوں پر اثر انداز ہوتے ہیں۔
با لی وڈ میگا اسٹار امیتابھ بچن، مادھوری ڈکشٹ، شاہ رخ خان، اکشے کمار، کترینہ کیف، انوشکا شرما، جیکولین فرنانڈس، شاہد کپور، عالیہ بھٹ، رنویر سنگھ، شریا گوشل، نیہا ککڑ اور ہریتھک روشن سمیت دیگر بھارتی شخصیات کو بھی فہرست میں شامل کیا گیا ہے۔
فہرست میں سب سے زیادہ چین کی شخصیات شامل ہیں جب کہ فہرست میں جنوبی کوریا، ہانگ کانگ، سنگاپور، ملائیشیا، انڈونیشیا، آسٹریلیا اور ایران سمیت دیگر ممالک کی شخصیات کو بھی شامل کیا گیا ہےفہرست میں شامل کی گئی –
نہ صرف شخصیات بلکہ برانڈز، گروپس اور بینڈز کو بھی لسٹ میں شامل کیا گیا ہے اور پہلے نمبر پر جنوبی کوریا کے خواتین کے میوزیکل بینڈ بلیک پنک کو رکھا گیا ہے، اسی فہرست میں جنوبی کورین بینڈ بی ٹی ایس کو بھی شامل کیا گیا ہے۔
فہرست میں ہولی وڈ اداکارہ 40 سالہ ربل ولسن کو بھی شامل کیا گیا ہے جو اصل میں آسٹریلوی ہیں، اسی فہرست میں آسٹریلوی نژاد ہولی وڈ ہیرو کرس ہیمس ورتھ کو بھی شامل کیا گیا ہے وہیں پاکستانی فنکاروں ماہرہ خان ایمن خان اور عاطف اسلم بھی اس فہرست میں اپنی جگہ بنانے میں کامیاب ہو ئے ہیں-
ماہرہ خان کا شمار پاکستان میں سوشل میڈیا پر سب سے زیادہ فالوورز رکھنے والی اداکاراؤں میں ہوتا ہے۔ ان کے انسٹاگرام پر تقریباً 7 ملین اور فیس بک پر 4 ملین سے زیادہ فالوورز ہیں۔ ماہرہ خان نے رواں سال اپنے سوشل میڈیا اکاؤنٹس کو دماغی صحت کے مسائل، خواتین پر تشدد اور چھاتی کے کینسر سے متعلق آگاہی پھیلانے کے لیے استعمال کیا۔
پاکستان کے مقبول ترین گلوکار و اداکار عاطف اسلم کے انسٹاگرام پر 5.3 ملین فالوورز ہیں۔ انہوں نے رواں سال مئی میں کورونا وبا کے دوران لوگوں میں امید جگانے اور لوگوں کی حوصلہ افزائی کے لیے’اسما الحسنیٰ‘ ریلیز کیاتھا جس میں انہوں نے خد اکے 99 ناموں کی تلاوت کی تھی۔ یوٹیوب پراس ویڈیو کو 22 ملین (2کروڑ 20 لاکھ) سے زائد لوگوں نے دیکھا تھا۔
عاطف اسلم کے فیس بک پر تقریباً 20 ملین فالوورز ہیں انہوں نے اپنے سوشل میڈیا اکاؤنٹس کے ذریعے لوگوں کو گھروں میں رہنے پر زور دیا کہ وہ کورونا وائرس کے پھیلاؤ کو روکنے کے لیے گھروں پر ہی رہیں۔
ایمن خان 7.7 ملین فالوورز کے ساتھ انسٹاگرام پرپاکستان کی سب سے زیادہ فالو کی جانے والی اداکارہ ہیں۔ ایمن اور ان کی جڑواں بہن منال خان انسٹاگرام پر اپنا کلودنگ برانڈ ایمن منال کلوزیٹ چلاتی ہیں۔ جس کے تقریباً 2 لاکھ 49 ہزار فالوورز ہیں۔ گزشتہ برس ایمن خان کو ڈراما سیریل ’باندی‘ اور ’عشق تماشا‘ میں بہترین اداکارہ کے لیے ہم ایوارڈز میں نامزد کیا گیا تھا۔
