ڈپٹی اسپیکر قومی اسمبلی کا کوئٹہ فائرنگ کے افسوسناک واقعے میں شہید بچے کے اہلخانہ سے اظہارِ افسوس

ڈپٹی اسپیکر قومی اسمبلی قاسم خان سوری کا آرچر روڈ کوئٹہ پر فائرنگ کے افسوسناک واقعے میں شہید ہونے والے 12 سالہ معصوم بچے امید خان کے اہلخانہ سے ٹیلیفون پر اظہارِ افسوس، تعزیت و فاتحہ خوانی، ڈپٹی اسپیکر قومی اسمبلی نے امید خان شھید کے اہلخانہ کو دلاسہ دیا اور انھیں یقین دھانی کرائی کہ سفاک مجرموں کو جلد گرفتار کر کے ان سے کسی قسم کی بھی رعایت نہیں برتی جائے گی۔

قبل ازیں ڈپٹی اسپیکر قومی اسمبلی نے آئی جی بلوچستان پولیس محسن بٹ سے ٹیلیفون پر گفتگو میں اس افسوسناک واقعے کی تفصیلات لیں اور انھیں اس واقعے میں ملوث مجرموں کی جلد ازجلد گرفتاری اور قرار واقعی سزا دینے کی ہدایات دیں۔ آئی جی بلوچستان پولیس نے ڈپٹی اسپیکر قومی اسمبلی کو مجرموں کی فوراً گرفتاری کی یقین دھانی کرائی اور بتایا کہ ڈی آئی جی کوئٹہ پولیس اس افسوسناک واقعے کی خود تحقیقات کر رہے ہیں۔

واضح رہے کہ امید خان اپنے غمزدہ باپ کے اکلوتے بیٹے تھے جو گھر کے قریب تندور سے روٹی لیتے ہوئے سفاک مجرموں کے درمیان کراس فائرنگ کی زد میں آ کر شہید ہو گئے۔