پاکستان نے بھارت کو پیچھے چھوڑ دیا
باغی ٹی وی : پاکستان کی صنعت اس وقت کھڑی ہو رہی ہے . بھارت میں سخت لاک ڈاؤن سے کاروبار ٹھپ تاہم پاکستان میں بیرونی آرڈر کی بھرمار ہو گئی، عالمی اداروں کی طرف سے رجوع کیے جانے کے بعد موجودہ مالی سال کے پہلے چار ماہ میں ملکی ٹیکسٹائل برآمدات 4.5 ارب ڈالر سے تجاوز کر گئیں۔پاکستان نے بھارت کو بچھاڑ دیا ہے
برطانوی خبر رساں ادارے کی رپورٹ کے مطابق حکومت اور ٹیکسٹائل کے شعبے سے وابستہ افراد کا کہنا ہے کہ یہ شعبہ اس وقت اپنی پوری پیداواری استعداد پر کام کر رہا ہے جو ملک کی برآمدات کے شعبے میں اضافے کے ساتھ روزگار کی فراہمی کے لیے بھی مثبت پیش رفت ہے۔
رپورٹ میں مزید کہا گیا کہ پاکستان کی ٹیکسٹائل کی برآمدات میں اضافے سے مجموعی برآمدات میں ہونے والے اضافے سے ملک کے تجارتی خسارے کو بھی کم کرنے میں مدد ملی ہے ،پاکستان کے ٹیکسٹائل کے شعبے میں پیداواری صلاحیت کا پوری استعداد پر چلنے اور اس کی مصنوعات کی برآمدات میں اضافے کو اس شعبے سے وابستہ افراد کورونا کے باعث نافذ پابندیوں میں نرمی اور صنعتی شعبے کے لیے حکومتی ریلیف اقدامات کی وجہ سے مصنوعات کی مانگ میں اضافے کا باعث بنا ہے۔
مشیر تجارت رزاق داؤد نے اپنے ایک بیان میں کہاہے کہ نومبر میں امریکہ کو پاکستانی برآمدات میں نمایاں اضافہ ریکارڈکیاگیاہے اور پہلی بار امریکا کو پاکستان کی ماہانہ برآمدات چارسوملین ڈالر سے زائد ہوئی ہیں۔
مشیر تجارت نے کہاکہ اکتوبر میں پاکستان کی امریکہ کو برآمدت 430 ملین ڈالرز تھیں، جبکہ نومبر میں پاکستان کی امریکہ کو برآمدات 437 ملین ڈالرز ریکارڈ کی گئیں۔رزاق داؤد نے کہاکہ برآمدکندگان کے لیے امریکی منڈیوں تک رسائی کا بڑا موقع ہے پاکستانی برآمدکندگان، امریکی منڈیوں تک مزید رسائی کے لیے برآمدات بڑھائیں.
