بالی وڈ کے آنجہانی اداکار سوشانت سنگھ راجپوت اور اداکارہ شردھا کپور کی 2019 میں ریلیز ہونے والی فلم ’چھچھورے‘ 51 ویں انٹرنیشنل فلم فیسٹول آف انڈیا (آئی ایف ایف آئی) میں اسکریننگ کیلئے منتخب کی گئی ہے۔
باغی ٹی وی :بھارتی میڈیا رپورٹ کے مطابق اداکارسوشانت سنگھ راجپوت گزشتہ سال 14 جون کو اپنے گھر میں مردہ قرار پائے تھے اور انہوں نے پنکھے سے لٹک کر خودکشی کرلی تھی۔
آنجہانی اداکار کی ریلیز ہونے والی فلموں میں ’چھچھورے‘ آخری فلم تھی جو ان کی زندگی میں 2019 میں ریلیز ہوئی تھی اس فلم میں ان کے مدمقابل شردھا کپور نے مرکزی کردار ادا کیا تھا جبکہ فلم کے ہدایت کار نتیش تیواری تھے۔
رپورٹس کے مطابق اب اس فلم کو 51 ویں انٹرنیشنل فلم فیسٹول آف انڈیا (آئی ایف ایف آئی) میں اسکریننگ کیلئے منتخب کرلیا گیا ہے۔ انٹرنیشنل فلم فیسٹول آف انڈیا رواں سال 16 سے 24 جنوری تک بھارتی شہر گوا میں ہوگا۔
واضح رہے کہ رواں سال 14 جون کو 34 سالہ اداکار سوشانت سنگھ راجپوت ممبئی میں اپنے فلیٹ میں مردہ حالت میں پائے گئے تھے جس کے بعد ان کے مداحوں کی جانب سے سوشانت سنگھ راجپوت کی موت کے معاملے پر سی بی آئی سے تفتیش کرنے کا مطالبہ کیا جا رہا تھا۔
بعد ازاں سوشانت سنگھ کے گھر والوں نے ان کی دوست ریا چکرورتی کو اداکارکی خودکشی کی وجہ قرار دیا تھا اور ان کے خلاف بہار میں مقدمہ بھی درج کرایا تھا جس کے بعد معاملہ سپریم کورٹ پہنچ گیا تھا۔
سشانت کے گھر والوں نے ریا چکرورتی پر الزام لگایا ہے کہ انہوں نے سشانت سے پیسے کیلئے تعلقات قائم کیے اسے نشے کا عادی بنایا ، اپنے فائدے کیلئے استعمال کیا اور ایسے حالات کا شکار کردیا کہ وہ خود کشی کرنے پر مجبور ہو گئے-
بعد ازاں ریا چکرورتی کو سوشانت سنگھ کو منشیات فراہم کرنے کے الزام میں گرفتار کیا گیا جہاں ریا چکرورتی کے بیانات نے کیس کو ایک نیا موڑ دے دیا جس میں بالی وڈ کی معروف شخصیات جب میں صف اول کی اداکارائیں دپیکا پڈوکون ، سارہ علی خان، شردھاکپوراداکار ارجن رامپال و دیگر کو این سی بی نے منشیات کے الزام میں طلب کیا گیا اور ان کے خلاف تحقیقات کی گئیں بھارتی شوبز میں منشیات کے تہلکہ خیز انکشافات کا سلسلہ تاحال جاری ہے-
