گزشتہ سال اسلام کی خاطر شوبز چھوڑنے والی سابق بالی وڈ اداکارہ ثنا خان اپنا ماضی کریدے جانے پر دلبرداشتہ ہوگئیں۔
باغی ٹی وی :بالی وڈ کی سابق اداکارہ ثنا خان نے گزشتہ سال اسلام کی خاطر شوبز کو خیر باد کہہ کر مفتی انس کے ساتھ شادی کرنے کا اعلان کیا۔
ثنا خان کی شادی کو دو ماہ کا عرصہ ہوگیا ہے اور اس دوران وہ ہمیشہ اپنی اور اپنے شوہر کی اس طرح کی ویڈیوز اور تصاویر شیئر کرتی ہیں جن میں وہ دونوں خوش نظر آتے ہیں اور ایک دوسرے کے ساتھ اچھا وقت گزارتے ہیں تاہم گزشتہ روز پہلی بار ثنا خان نے انسٹاگرام پر ایک ایسی پوسٹ شیئر کی جس میں وہ پریشان نظر آرہی ہیں۔
لیکن ان کی پریشانی ان کے گھریلو زندگی یا شوہر کی وجہ سے نہیں۔ بلکہ ان لوگوں کی وجہ سے ہے جو ان کا ماضی بھول ہی نہیں رہے۔ اور اکثر ان کے ماضی کے متعلق منفی ویڈیوز بنا کر شیئر کرواتے رہتے ہیں۔
اسی حوالے سے گزشتہ روز ثنا خان نے اپنے تصدیق شادہ انسٹا گرام اکاؤنٹ پر ایک پوسٹ شیئر کی اور کہا کچھ لوگ کافی عرصے سے میرے متعلق منفی ویڈیوز بنارہے ہیں لیکن میں نے صبر سے کام لیا اور کچھ نہیں کہا۔
لیکن اب ایک شخص نے ایک ویڈیو بنائی ہے جس میں میرے ماضی کو کریدا گیا ہے اور ویڈیو میں میرے متعلق نہایت نامناسب باتیں کی گئی ہیں۔
انہوں نے سوال کیا کہ کیا آپ نہیں جانتے جب ایک شخص توبہ کرلیتا ہے تو اسے اس کے ماضی سے متعلق احساس کروانا بھی گناہ ہے۔ میں اس وقت بہت دلبرداشتہ ہوں میرا دل ٹوٹ گیا ہے-
پوسٹ کے ساتھ ثنا خان نے بتایا کہ وہ ویڈیو بنانے والے شخص کا نام نہیں بتانا چاہتیں۔ تاہم انہوں نے انہیں پریشان کرنے والے لوگوں سے کہا اگر آپ کسی کو سپورٹ نہیں کرسکتے تو کم سے کم اس کے ساتھ اچھا رویہ اختیار کریں اور خاموش رہیں۔
ثنا خان نے کہا کہ کسی کے بارے میں اتنے بُرے تبصرے نہ کریں کہ وہ اپنے ماضی سے متعلق سوچ کر ڈپریشن میں چلا جائے۔
سابق اداکارہ نے کہا کہ بعض اوقات لوگ توبہ کرتے ہیں اور زندگی میں آگے بڑھ جاتے ہیں لیکن کچھ لوگ میری طرح بھی ہوتے ہیں جو سوچتے ہیں کہ کاش میں ماضی میں واپس چلی جاؤں اور کچھ چیزیں تبدیل کرسکوں۔
انہوں نے ایسے لوگوں سے درخواست کرتے ہوئے کہا کہ مہربانی کرکے دوسروں کے ساتھ نرم رویہ اختیار کریں اور لوگوں کو وقت کے ساتھ بدلنے دیں۔
