وزیر اعظم کو فرانس کے گستاخ صدر کے خلاف مہم جوئی کا وعدہ یاد دلايا جائے، سربراہ تحریک لبّیک یا رسول اللّه ﷺ

تاریخ: 02-01-2021
لاہور: تحریک لبیک یا رسول اللہ صلی اللہ علیک وسلم کے سربراہ ڈاکٹر محمد اشرف آصف جلالی نے کہا: وزیر اعظم کے مقرب علماء و مشائخ اسے فرانس کے گستاخ صدر کے خلاف مہم جوئی کا وعدہ یاد کرائیں۔ حکومت فرانس کے ساتھ اپنے معاہدے نبھانے سے پہلے اللہ تعالیٰ کے ساتھ اپنا کیا ہوا عہد نبھائے۔ سرکاری سطح پر گستاخی کرنے والے ملک فرانس کے خلاف جہاد ہی سے گستاخی کا بدلہ لیا جا سکتا ہے۔ المیہ یہ ہے کہ حکومت اس سلسلہ کا ابتدائی کام یعنی فرانس کے سفیر کو نکالنا بھی سرانجام نہیں دے سکی۔ حکومت کس قدر بے حس ہے کہ تحفظ ناموس رسالت ﷺ کے اہم فریضے کے بارے میں بھی ٹال مٹول کر رہی ہے۔ ایک اسلامی ملک کے حکمران عوام کے ایمانی جذبات کی دنیا کے سامنے ترجمانی کے بھی ذمہ دار ہوتے ہیں۔ وزیر اعظم قوم کو بتائے کہ اس نے فرانس کے ملعون صدر کا توہین رسالت ﷺ کے جرم پر کون سا محاسبہ کیا ہے؟ تحفظ ناموس رسالت ﷺ جیسے اہم ایمانی ایشوز پر جھوٹے دعووں اور وعدوں کا قیامت کے دن شدید ترین مواخذہ ہو گا۔ توہین رسالت ﷺ کا ارتکاب کر کے فرانس کے ملعون صدر نے جن کروڑوں عاشقانِ رسول ﷺ کے دل زخمی کیے تھے، وہ ابھی تک مرہم کی تلاش میں ہیں۔