شاہدرہ میں اندھے قتل کا ڈراپ سین، دوست ہی قاتل نکلے

لاہور: قتل کبھی نہیں چھپتا ، شاہدرہ میں مقتول ملک طاہر کے اغواکے بعد اندھے قتل کا ڈراپ سین، دوست ہی قاتل نکلے، ملزمان قتل کے بعد ورثا کیساتھ مل کر مقتول کو ڈھونڈنے کا ڈرامہ بھی رچاتے رہے تھے۔

لاہور پولیس کے مطابق تقریباً ایک ماہ قبل ملک طاہر نامی شخص گھر سے اچانک غائب ہوگیا تھا اور 2 روز بعد اس کی نعش بلوکی ہیڈ کے قریب سے برآمد ہوئی تھی، پولیس نے تحقیقات کا آغاز کیا تو مقتول کے 2 دوستوں کو بھی شامل تفتیش کر لیا گیا۔ مقتول کے دوست عمران اور علی حسن بہانے سے مقتول کو راوی پل سگیاں لے گئے جہاں ملزمان نے ملک طاہر کو دریا میں دھکا دے کر ہلاک کر دیا۔

پولیس ذرائع کے مطابق بعدازاں ملزمان ورثاء کے ساتھ مل کر مقتول کو ڈھونڈنے کا ڈرامہ بھی رچاتے رہے، پولیس نے بتایا کہ ساندہ کے رہائشی مقتول ملک طاہر کی نعش پانی میں بہہ گئی تھی جو بعد ازاں ہیڈ بلو کی سے ملی۔ پولیس کا کہنا تھا کہ ملزمان نے ملک طاہر کو معمولی رنجش اور نوک جھوک پر قتل کر دیا تھا۔