پنجاب بدلنے لگا،نئے اضلاع اور تحصیلیں بنائی جائیں گی، وزیراعلیٰ پنجاب

لاہور :پنجاب بھی بدلنے لگا اور اس کا اعلان بھی سردار عثمان بزدار نے ہی کیا ہے. اطلاعات کے مطابق صوبے کے انتظامی معاملات میں بہتری اور حکومتی رٹ کو موثر بنانے کے لیے وزیراعلیٰ پنجاب سردار عثمان بزدار نے کہا ہے کہ صوبے میں نئے اضلاع اور تحصیلیں بنانے کیلئے کمیٹی قائم کر دی ہے،

ان خیالات کا اظہار انہوں نے سرکٹ ہاﺅس میں ملاقات کیلئے آنے والے فیصل آباد ڈویژن سے تعلق رکھنے والے اراکین قومی و صوبائی اسمبلی سے گفتگو کرتے ہوئے کیا۔ اس موقع پر گورنر پنجاب چوہدری محمد سروربھی موجود تھے۔اس دوران وزیراعلیٰ عثمان بزدار اراکین اسمبلی کی تجاویز، سفارشا ت اور مسائل خود نوٹ کرتے رہے۔

ذرائع کے مطابق چار گھنٹے طویل ملاقات میں ان کا کہنا تھا کہ ماضی کے حکمرانوں نے ذاتی نمائش کے منصوبوں پر اربوں روپے کے وسائل برباد کئے۔ عوام سابق ادوار کے حکمرانوں کو یکسر فراموش کر چکی ہے۔نیا پاکستان بن رہا ہے اور بن کر رہے گا۔

فیصل آباد ڈویژن میں ترقیاتی کاموں کے حوالے سے عثمان بزدار کا کہنا تھا کہ 500 ترقیاتی منصوبوں پر152 ارب روپے خرچ کئے جائیں گے۔ فیصل آباد ڈویژن کیلئے مثالی ترقیاتی پیکیج دیا ہے۔ فیصل آباد میں واسا کو فعال بنایا جائے گا۔ عوام کو پانی اور بجلی سمیت تمام سہولیات فراہم کی جائیں گی۔