پاکستان شوبز انڈسٹری کے معروف اداکار شہروز سبزواری نے وزیر اعظم عمران خان کو ایک اہم پیغام دیا ہے۔
باغی ٹی وی : اداکار شہروز سبزواری نے اپنے تصدیق شدہ انسٹاگرام اکاؤنٹ پر اردو اور انگلش میں ایک اسٹوری شیئر کی جسے انہوں نے پاکستان تحریک انصاف (پی ٹی آئی) اور وزیر اعظم عمران خان کے آفیشل اکاؤنٹس کو بھی ٹیگ کیا۔
شہروز سبزواری نے اپنی اسٹوری میں عمران خان کو اہم پیغام دیتے ہوئے کہا کہ عمران خان ہم آپ کے سپورٹر ضرور ہیں مگر حضور پاک ﷺ کے سامنے یہ کائنات بھی کچھ نہیں ہے۔
اداکار شہروز سبزواری نے کہا کہ پنجاب ٹیکسٹ بُکس کو ٹھیک کرو ورنہ تباہی تیرا مقدر ہے۔
واضح رہے کہ گزشتہ سال پنجاب میں قومی ہیروز اور ملکی سالمیت کے خلاف مواد پر مبنی 31 پبلشرز کی کتابوں پر پابندی عائد کی گئی تھی۔
اس حوالے سے لاہور میں پریس کانفرنس کرتے ہوئے مینیجنگ ڈائریکٹر پنجاب ٹیکسٹ بوڑد رائے ناصر نے کہا تھا کہ 31 پبلشرز کی کتابوں پر پابندی عائدکر رہے ہیں، ان کتابوں میں قومی ہیروز اور ملکی سالمیت کے خلاف مواد موجود ہے۔
انہوں نے کہا تھا کہ اسلام، ملکی سلامتی، امن عامہ اور اخلاقیات کے خلاف کچھ بھی شائع نہیں ہوسکتا لہٰذا قانون کے مطابق یہ پانچ چیزیں غلط ہونے پر کتاب پرپابندی ہوگی۔
رائے ناصر کا کہنا تھا کہ پہلے بھی نجی اسکولوں میں پڑھائی جانے والی 100 کتب پر پابندی لگا چکے ہیں جس میں بھارت کے خلاف ہمارا جھگڑا کشمیر کا ہے اور کشمیر کو بھارت کا حصہ دکھایا ہے یہاں تک کہ غزوہ احد کے بارے بے شمار ناقابل برداشت باتیں شائع ہیں۔
ان کا کہنا تھا کہ آکسفورڈ کی بیشتر کتابوں میں پاکستان کو خراب ملک بتایا گیا ہے اور بھارت کو ہم سے بہت بہتر دکھایا گیا ہے جب کہ کیمبرج کی کتابوں میں بچوں کو انتہا پسندی کی ترغیب دی جارہی ہے اس لیے نجی اسکولوں میں پڑھائی جانے والی 10 ہزار سے زائد کتابوں کو چیک کرنے جارہے ہیں کیوںکہ بڑے اسکولوں میں بچوں کی ان کتابوں کے ذریعے تربیت کی جارہی ہے۔
