گزشتہ روز کینیڈین ٹریول بلاگر روزی گیبریل نے پاکستانی وی لاگر عدیل عامر کے ساتھ رشتہ ازدواج میں منسلک ہونے کا اعلان کیا تھا۔
باغی ٹی وی : روزی گیبریل نے اپنے تصدیق شدہ انسٹاگرام پر اسٹوری پر شادی کی تصاویر اور ویڈیو شیئر کی ہیں جس میں روزی کو شوہر عدیل عامر کے ہمراہ ڈانس کرتے اور وینیو میں بائیک پر انٹری دیتے دیکھا جاسکتا ہے۔
روزی نے شادی کے لیے میرون کلر اور گولڈن ورک کے خوبصورت مشرقی طرز کے عروسی لباس کا انتخاب کیا تھا۔
انہوں نے شادی کی تقریب میں کیے گئے ڈانس کو پاکستانی شادیوں کا بہترین حصہ قرار دیا اور یہی نہیں انہوں نے ’پاوری ٹرینڈ ‘کو اپنی شادی کا حصہ بنایا ۔
خیال رہے کہ گزشتہ روز شادی کے اعلان سے متعلق اپنی انسٹا پوسٹ میں روزی نے لکھا تھا کہ میں شادی شدہ ہوں، میں نے کبھی سوچا بھی نہیں تھا کہ میں پاکستان آؤں گی اور اس ملک، یہاں کے عوام اور ایک خاص فرد کے ساتھ محبت میں مبتلا ہو جاؤں گی، میں نے پوری زندگی اپنے جیون ساتھی اور بہترین دوست کی تلاش کی۔
انہوں نے مزید لکھا کہ مجھے ناصرف اپنا ساتھی ملا بلکہ ایک بہترین دوست بھی مل گیا، یہ وہ شخص ہے جس کو میں بے حد پسند کرتی ہوں اور بےتحاشہ محبت کرتی ہوں۔
روزی نے لکھا تھا کہ ایسا شخص جس کو میں ہر ایک بات کسی بھی جھجھک کے بغیر بتا سکتی ہوں اور جو مجھے روزانہ بہتر انسان بنا رہا ہے وہ جو مجھ سے غیر مشروط محبت کرتا ہے، وہ شخص جو میری زندگی کو روشن کرتا ہے اور مجھے ہر دن اپنی محبت اور اعمال سے متاثر کرتا ہے، وہ شخص جو روزانہ میری تعریف کرتا ہے۔
اُنہوں نے اپنے شو ہر سے محبت کا اظہار کرتے ہوئے لکھا تھا کہ خدا نے میرے شوہر کے روپ میں مجھے زندگی کا سب سے بہترین تحفہ دیا ہے۔
واضح رہے کہ طویل وقت پاکستان میں گزارنے والی کینیڈین ٹریول بلاگر روزی گیبرئیل نے گزشتہ برس اسلام قبول کرنے کا اعلان کیاتھا انہوں نے انسٹاگرام پر ایک پوسٹ کے ذریعے بتایا تھا کہ 2019 ان کی زندگی کے مشکل ترین سالوں میں سے ایک تھا لیکن زندگی کے تمام چیلنجز نے انہیں آج اس نقطے پر پہنچا دیا ہے گزشتہ ایک دہائی سے مسلم ممالک میں سفر کے دوران انہوں نے دیکھا کہ اسلام امن کا مذہب ہے-
