سندھ میں ہزاروں اسکول بند ہیں، سیکرٹری تعلیم کا اعتراف

کراچی سندھ کے سیکرٹری تعلیم نے صوبے میں ہزاروں اسکول بند ہونے کا اعتراف کرلیا۔سندھ ہائیکورٹ میں صوبے میں مفت تعلیم اور اصلاحات سے متعلق درخواست پر سماعت کے دوران سیکرٹری تعلیم کی جانب سے رپورٹ عدالت میں پیش کی گئی۔رپورٹ میں اعتراف کیا گیا ہےکہ سندھ بھر میں 6866 اسکول بند ہیں اور صوبے بھر کے 7974 اسکول چلانے کے قابل ہی نہیں جب کہ کراچی کے 6 اضلاع میں 229 اسکول بند ہیں اور سب سے زیادہ ضلع ملیر میں 137 اسکول بند پڑے ہیں۔رپورٹ میں کہا گیا ہےکہ صوبے بھر میں 46549 اساتذہ کی کل آسامیاں خالی ہیں جن میں پرائمری اساتذہ کی 32510 اور جونیئر ایلیمنٹری اساتذہ کی 14039 آسامیاں خالی ہیں۔رپورٹ میں کہا گیا ہے کہ صوبے میں کیبنٹ کی منظوری کی بعد آئن لائن ٹرانسفر پوسٹنگ کی پالیسی متعارف کرائی ہے جس سے بند اسکول کھولنے میں مدد فراہم ہوگی جب کہ نئے اساتذہ کی بھرتیاں تھرڈ پارٹی آئی بی اے کے ذریعے کی جائیں گی اور اساتذہ کی بھرتیوں کے لیے اشتہار بھی شائع کرادیا گیا ہے۔رپورٹ میں مزید کہا گیا ہےکہ نئے اساتذہ کی بھرتیوں سے بند اسکول کھولے جائیں گے اور اساتذہ کی حاضری یقینی بنانے کے لیے بائیو میٹرک سسٹم نصب کردیا ہے۔بعد ازاں عدالت نے کہا کہ آئندہ سماعت پر بتایا جائے کہ صوبے میں کتنے فیصد تعلیم مفت فراہم کی جارہی ہے جب کہ اساتذہ کی بھرتیوں سے متعلق بھی تمام کارروائی 4 ماہ میں مکمل کرکے بتائی جائے۔عدالت نے درخواست کی مزید سماعت 13 اپریل تک ملتوی کردی۔