سوشل سکیورٹی اسپتال اسلام آباد میں لوٹ مار کا بازار گرم
![](https://baaghitv.com/wp-content/uploads/2021/05/Corel-Office-work.jpg)
اسلام آباد سوشل سکیورٹی اسپتال سے متعلق ایک متنازعہ خبر سامنے آئی ہے جس میں ندیم نامی وارڈ بوائے کو چیک اپ کے لیے آئے مریضوں سے فیس وصول کرتے ہوئے دیکھا گیا ہے۔ پاکستان سٹیزن پورٹل پر ایک شہری کی جانب سے جمع کروائی گئی شکایت کے مطابق اسلام آباد سوشل سکیورٹی اسپتال میں بغیر کارڈ کے مریضوں کو چیک کرنے اور ان سے فیس وصول کرنے کا انکشاف ہوا ہے۔
شکایت گزار کے مطابق اس کا سوشل سکیورٹی کارڈ نہیں بنا ہوا تھا لیکن اس کے باوجود وہ بچوں کو ساتھ لیے اوپی ڈی میں چیک اپ کے لیے چلا گیا۔ وہاں پہنچ کر اسے معلوم ہوا کہ یہاں تو بس انہی لوگوں کا چیک اپ کیا جاتا ہے جن کے پاس سوشل سکیورٹی کارڈ ہوتا ہے۔ حقیقت معلوم ہونے پر شکایت گزار نے واپسی کی راہ لی لیکن اسی دوران اس نے ایک شخص کو خاتون اور بچے کے ہمراہ چیک اپ کروا کے کمرے سے باہر کاوٴنٹر پر آتے اور وارڈ بوائے کے ہاتھ میں فیس تھماتے دیکھا۔ وارڈ بوائے کو فیس دینے والے شخص کے پاس بھی سوشل سکیورٹی کارڈ نہ تھا ۔
سوشل سکیورٹی اسپتال اسلام آباد میں لوٹ مار کا بازار گرم، پیسے لے کر بغیر کارڈ والے مریضوں کا بھی چیک کیا جانے لگا pic.twitter.com/ioaWWI1yOO
— Baaghi TV باغی ٹی وی (@BaaghiTV) May 21, 2021
اس کے بعد جب شکایت گزار نے وارڈ بوائے سے استفسار کیا کہ یہ کیا ماجرا ہے تو اس نے بتایا کہ یہ ڈاکٹر صاحبان کے پرائیویٹ مریض ہیں جو کہ اکثر یہاں چیک اپ کروانے آتے رہتے ہیں ، آپ چھوڑیں، آپ کا کیا لینا دینا اس سے۔ تو شکایت گزار نے وارڈ بوائے سے کہا کہ وہ اس سے بھی فیس وصول کر لیں اور بطور پرائیویٹ مریض ان کے بچوں کا بھی چیک اپ کر دیں جس پر شکایت گزار کو صاف انکار سننا پرا۔ شکایت گزار نے اس سارے منظر کی ویڈیو بھی بنا لی ہے جو کہ بطور ثبوت اس نے سیٹزن پورٹل پر اپلوڈ کر رکھی ہے۔