کراچی کے علاقےگلشن معمار سے انتہائی مطلوب ڈکیت گروہ کے4ملزمان گرفتار

پاکستان رینجرز (سندھ) اور پولیس نے انٹیلی جنس معلومات کی بنیاد پر مشترکہ کارروائی کرتے ہوئے کراچی کے علاقے گلشن معمار سے انتہائی مطلوب ڈکیت گروہ کے4ملزمان عبدالرزاق عرف بونا، محمد شمریز، محمد راشد عرف دودھ والا، عدیل عرف عادل کو گرفتار کر لیا۔ملزمان کے قبضے سے ڈکیتیوں کی وارداتوں میں استعمال ہونے والا اسلحہ بھی بر آمد کر لیا۔
دوران تفتیش ملزمان نے اعتراف کیا کہ نیو کراچی، گلشن معمار، سہراب گوٹھ اور سپر ہائی وے پر 2016سے دودھ کی رقم لے جانے والے ٹھیکیداروں سے لاکھوں روپے لوٹتے رہے۔ ملزمان نے اس کے علاوہ گلشن اقبال، واٹر پمپ، سپر ہائی وے،گلشن معمار اور نیو کراچی کے علاقے میں 300سے زائد چوری، ڈکیتی اور موبائل فون چھیننے کی وارداتوں کا اعتراف کیا۔ اس کے علاوہ مذکورہ ڈکیت گینگ نے مختلف مصنوعات کےسیلز مین کی50سے زائد گاڑیوں کو بھی لوٹنےکااعتراف کیاہے۔
گرفتار ملزمان کو بمعہ اسلحہ اورایمونیشن قانونی کارروائی کے لیے پولیس کے حوالے کر دیا گیا ہے۔ ملزم کے دیگر ساتھیوں کی گرفتار ی کے لیےچھاپے مارے جا رہے ہیں۔