پاکستان شوبز انڈسٹری کے معروف اداکار فیروز خان نے جوس بیچنے والے چین سے ایئرو ناٹیکل انجینئر کی ڈگری حاصل کرنے والے شخص کو ملازمت کی پیشکش کردی۔
باغی ٹی وی : حال ہی میں خبروائرل ہوئی تھی کہ پشتو، اردو، انگریزی، عربی اور چائنیز زبانیں پر عبور رکھنے والے سوات کے عبدالملک چین سے ایئرو ناٹیکل انجینئرنگ کی ڈگری لے کر وطن واپس آئے ہیں مگر سفارش نہ ہونےکے باعث آج بھی مناسب نوکری کی تلاش میں ہیں۔
عبدالملک کی اسکولنگ عرب امارات میں ہوئی جبکہ ایئروناٹیکل انجینئرنگ کی ڈگری انہوں نے چین کی یونیورسٹی سے حاصل کی اور اچھے مستقبل کا خواب لے کر پاکستان آیا تھا، ایئرو ناٹیکل کمپلیکس کامرہ میں انٹرن شپ کی۔
عبدالمالک کے مطابق پشاور فلائنگ کلب میں ٹرینی انجینئر اور ایک نجی ایئرلائن میں اسسٹنٹ ریمپ آفیسر کی ملازمتوں میں چند سال بھی لگائے مگر نہ اہلیت کے مطابق عہدہ ملا، نہ حق کے مطابق تنخواہ ہی ملی۔
جب بیس پچیس ہزار میں گھر چلانا ممکن نہ رہا تو عبدالملک زندگی کی گاڑی گھسیٹنے کراچی آ گئے اور یہاں تربوز کا جوس بیچنے لگے۔
حال ہی میں سوشل میڈیا سائٹ انسٹاگرام کے ایک معروف شوبز پیج کی جانب سے یہ خبر شیئر کی گئی کہ چین سے ایئرو ناٹیکل انجینئرنگ کی ڈگری لے کر وطن واپس آنے والا تربوز کا جوس بیچنے پر مجبور ہے۔
یہ خبر دیکھنے کے بعد جہاں صارفین نے شدید افسردگی کا اظہار کیا تو وہیں فیروز خان نے نوجوان کو ملازمت کی پیشکش کردی۔
فیروز خان نے پوسٹ پر کمنٹ کرتے ہوئے لکھا کہ ’اگر کوئی مجھ سے ان کا رابطہ کروا سکے تو میں اس نوجوان کو ملازمت دینا چاہتا ہوں۔‘
اداکار کی اس پیشکش پر سوشل میڈیا صارفین اداکار کی تعریف کر رہے ہیں-
