تمام کٹیگریزکو یکساں میچ فیس دی جائے گی، وسیم خان

گورننگ بورڈ سے آئندہ مالی سال 22-2021 کی منظوری کے ساتھ ہی پی سی بی نے مینز سینٹرل کنٹریکٹ برائے 22-2021 کا اعلان کردیا ہے۔ 20 ایلیٹ کرکٹرز کے لیے اعلان کردہ اس فہرست میں کنٹریکٹ کی تین مختلف کٹیگریز سمیت تین ایمرجنگ کرکٹرزکوبھی شامل کیا گیا ہے.
اس فہرست کو حتمی شکل دینے والےتین رکنی پینل میں ڈائریکٹرانٹرنیشنل ذاکر خان، چیف سلیکٹر محمد وسیم اورڈائریکٹرہائی پرفارمنس ندیم خان شامل تھے، اس دوران پینل نے قومی کرکٹ ٹیم کے ہیڈ کوچ مصباح الحق اورکپتان بابراعظم سے بھی مشاورت کی ہے، جس کے بعد کنٹریکٹ کی یہ فہرست پہلے چیف ایگزیکٹو وسیم خان اورپھرحتمی منظوری کے لیے چیئرمین پی سی بی کے پاس بھجوائی گئی ہے، 12 ماہ پر مشتمل یہ کنٹریکٹ یکم جولائی 2021 سے 30 جون 2022 تک جاری رہے گا۔
مینز سینٹرل کنٹریکٹ لسٹ میں شامل کھلاڑیوں کی فہرست میں
کٹیگری اے میں بابراعظم، حسن علی، محمد رضوان اورشاہین شاہ آفریدی شامل ہیں.
کٹیگری بی میں اظہرعلی، فہیم اشرف، فخرزمان، فواد عالم، شاداب خان اوریاسرشاہ شامل ہیں.
کٹیگری سی میں عابد علی، امام الحق، حارث رؤف، محمد حسنین، محمد نواز، نعمان علی اورسرفراز احمد شامل ہیں.
ایمرجنگ کٹیگری میں عمران بٹ، شاہنوازدہانی اورعثمان قادر شامل ہیں.
کنٹریکٹ میں نظر ثانی کی گئی ہے،
کٹیگری اے کے ماہوار وظیفے میں 25 فیصد اضافہ کیا ہے، کسی بھی فارمیٹ کی میچ فیس میں اضافہ نہیں کیا گیا ہے.
کٹیگری بی کے ماہواروظیفے میں 25 فیصد اضافہ کیا ہے، ٹیسٹ کی میچ فیس میں 15 فیصد اضافہ کیا ہے، ون ڈے انٹرنیشنل کی میچ فیس میں 20 فیصد اورٹی ٹونٹی انٹرنیشنل کی میچ فیس میں 25 فیصد اضافہکیا ہے.
کٹیگری سی کے ماہواروظیفے میں 25 فیصد اضافہ کیا ہے، ٹیسٹ کی میچ فیس میں 34 فیصداضافہ کیا ہے، ون ڈے انٹرنیشنل کی میچ فیس میں 50 فیصد اورٹی ٹونٹی انٹرنیشنل کی میچ فیس میں 67 فیصد اضافہ کیا ہے.
ایمرجنگ کٹیگری کے ماہوار وظیفے میں 15 فیصد اضافہ۔ٹیسٹ کی میچ فیس میں 34 فیصد اضافہ کیا ہے، ون ڈے انٹرنیشنل کی میچ فیس میں 50 فیصد اور ٹی ٹونٹی انٹرنیشنل کی میچ فیس میں 67 فیصد اضافہ کیا ہے.
اس کنٹریکٹ کے تحت حسن علی اور محمد رضوان کو کٹیگری اے میں شامل کرلیا گیا ہے، حسن علی گزشتہ سال انجری کی وجہ سے کنٹریکٹ حاصل نہیں کرپائے تھے، تاہم سیزن 21-2020 میں شاندار کارکردگی کی بدولت انہوں نے سیزن 22-2021 کے لیے کنٹریکٹ کی اے کٹیگری حاصل کرلی ہے، محمد رضوان کو مستقل کارکردگی کی بدولت کٹیگری اے میں ترقی دی گئی ہے، فہیم اشرف، فواد عالم، محمد نوازاورنعمان علی کو بھی انٹرنیشنل کرکٹ میں متاثرکن کارکردگی کی بدولت سینٹرل کنٹریکٹ برائے 22-2021 کی فہرست میں شامل کرلیا گیا ہے.
گزشتہ سال ایمرجنگ کٹیگری میں شامل فاسٹ باؤلرزحارث رؤف اورمحمد حسنین کو کٹیگری سی میں ترقی دی گئیئ ہے، شاہنواز دہانی، عثمان قادراورعمران بٹ کو ایمرجنگ کٹیگری میں شامل کرلیا گیا ہے۔
اسد شفیق، حیدرعلی، حارث سہیل افتخاراحمد، عماد وسیم، محمدعباس، نسیم شاہ، شان مسعود اورعثمان شنواری کو سیزن 22-2021 کے لیے سینٹرل کنٹریکٹ پیش نہیں کیا گیا ہے، تاہم یہ تمام کھلاڑی سلیکٹرز کے پلانز کا حصہ ہیں اور نمایاں کارکردگی کا مظاہرہ کرکے آئندہ سال کے لیے کنٹریکٹ حاصل کرسکتے ہیں۔
چیف ایگزیکٹو پی سی بی وسیم خان کا کہنا ہے کہ معیاری کھلاڑیوں کے بڑے پول میں سے 20 کھلاڑیوں کا انتخاب کرنا ہمیشہ ایک مشکل مرحلہ ہوتا ہے، وہ اس موقع پر احسن انداز سے اپنی ذمہ داریاں نبھانے پر پینل کا شکریہ ادا کرتے ہیں، گزشتہ سال کے مقابلے میں اس فہرست میں 8 نئے کھلاڑیوں کوکنٹریکٹ دیا گیا اور9 سے واپس لیا گیا ہے، تاہم ان 9 کھلاڑیوں کے لیے دروازے کھلے ہیں اور یہ سلیکٹرز کے پلانز کا حصہ ہیں، ابھرتے ہوئے ٹیلنٹ کی حوصلہ افزائی کے لیے اس سال ایمرجنگ کٹیگری میں شاہنواز دھانی، عمران بٹ اورعثمان قادر کو شامل کیا گیا ہے، ملک کی نمائندگی کرنے والے تمام کھلاڑیوں کو اب یکساں میچ فیس ملے گی، چاہے وہ کسی بھی طرز کی کرکٹ کھیل رہا ہو یا اس کے پاس سینٹرل کنٹریکٹ ہے یا نہیں، ہم نے معاشی طور پرایک چیلنجنگ سال کے باوجود سینٹرل کنٹریکٹ میں شامل کھلاڑیوں کی آمدن میں اضافہ کیا ہے.