لاہور: بالآخر بلدیاتی نمائندوں کی بھی سنی گئی ، محکمہ خزانہ نے بیس ماہ بعد بلدیاتی اداروں کو ترقیاتی گرانٹ جاری کردی۔پنجاب کے بلدیاتی اداروں کو دو ارب پچھتر کروڑ پینتیس لاکھ روپے کی گرانٹ جاری کی گئی ہے۔ میٹروپولیٹن کارپوریشن لاہور کو سولہ کروڑ پچیس لاکھ روپے ملیں گے، میونسپل کارپوریشن فیصل آباد کو دو کروڑ ساٹھ لاکھ روپے دئیے جائیں گے۔
محکمہ خزانہ پنجاب کی طرف سے دئیے گئے اعدادوشمار کے مطابق میونسپل کارپوریشن بہاولپور کو ایک کروڑ اکتیس لاکھ ادا کئے جائیں گے جبکہ جاری کردہ گرانٹ میں سے ڈی جی خان میونسپل کارپوریشن کو دوکروڑ باسٹھ لاکھ روپے ملیں گے۔
ذرائع کے حوالے سے ملنی والی معلومات کے مطابق گجرانولہ کو دو کروڑ انتالیس لاکھ روپے، گجرات کو دوکروڑ ستاون لاکھ روپےملیں گے۔ میٹروپولیٹین کارپوریشن ملتان کیلئے گرانٹ میں سے چار کروڑ تریسٹھ لاکھ روپے جبکہ راولپنڈی کیلئے دوکروڑ انچاس لاکھ روپے مختص کیے گئے ہیں۔
محکمہ خزانہ پنجاب نے میونسپل کارپوریشن مری کو ایک کروڑ بائیس لاکھ، ساہیوال کو تین کروڑ اڑتیس لاکھ روپے جبکہ میونسپل کارپوریشن سیالکوٹ کو چار کروڑ انتیس لاکھ کی گرانٹ جاری ہوگی۔
یاد رہےکہ صوبائی مالیاتی کمیشن کی مد میں بلدیاتی اداروں کو گرانٹ ڈیڑھ سال سے بند تھی۔ ترقیاتی گرانٹ بند ہونے سے ترقیاتی کام اور مفاد عامہ کے منصوبے اور سروسز متاثرہورہی تھیں۔
